Aizawl: Health Minister Dr R Lalthangliana’n College of Veterinary Sciences & Animal Husbandry, Central Agricultural University Selesih, Aizawl, Mizoramin College Week kharna hun an buatsaih a hmanpui a, kalkhawmte chu hriselna lama invawng thianghlim turin a chah.
Zirtawpni tlaia hun hmanah health minister hian thu sawiin, “Kan hausakna hi kan hloh chuan eng emaw tak kan hloh a, kan hriselna kan hloh chuan engkim kan chân a ni. Mihring hi kan hrisel loh chuan ngahin awmzia a nei lo,” a ti.
Khuallian chuan zirlai kalkhawmte hmaah fuihna thu sawiin, “Kum zabi 21-naah zirlaite hian chona nasa tak leh tumruhna nei ang che u. Zirlai satliah, MBBS naran, doctor satliah nih ngawt a tawk lo a, a thiam filawr ber nih zel tum ang che u. Company a ni emaw, sorkar hnaah emaw pawh competition a sang tawh em em tih hria ang che u,” a ti bawk.
Minister hian kum 2020 tir lama Covid-in khawvela buaina leh harsatna a thlena tirh khan ZMC-ah RT-PCR a la neih loh avanga an buai laia Vety college khawlte phal taka an hmantir avangin lawmthu a sawi.
Dr.R. Lalthangliana hian college-a New Academic Block thlawh nghalin Veterinary Pathalogy, Veterinary Public Health & Epidemilogy, Veterinary Microbiology, Transboundary Animal Disease Laboratory room a fang kual a. Outdoor leh Indoor games-a tel leh ti thate hnenah certificate leh lawmman a sem nghal.