Kartawpah Premier League khelh a ni a, thil danglam lo pakhat a thleng chhunzawm. Chu chu Manchester City striker Erling Haaland a ni a, goal hnih a khung.
Haaland-a goal hnih khung avang hian 3-1 in Brighton & Hove Albion an hneh a, kum 91 dinglai ni tawh English top flight football record chu Man City hian an tluk.
City hian a zawnin Premier League-ah mahni mualah vawi 10 hnehna an chang a, hetih chhung hian an inkhelh apiangin goal thum tal an khung. Kum 1930 leh 1931 a Aston Villa in record an siam chu an tluk.
Goal thun khawl
Etihad Stadium-ah Haaland a inlar leh a, goal khung loh match khat a neih hnuah a hna ngai a chhunzawm. League inkhel 11 atangin goal 17 a khung tawh a, mahni muala an inkhel hnuhnung panga atang goal 12 a khung.
Captain Kevin de Bruyne chuan an goal thumna khungin minute 75-naah goal mawi a khung ve bawk.
Leandro Trossard chuan Brighton tan second half-ah goal khat a khung ve bawk a. Mahse coach thar Roberto de Zerbi hnuaiah chak an la nei lo.
Manchester City manager Pep Guardiola chuan, “Anfield a kan tlawm avangin point thum hmuh hi a pawimawh hle a, inkhel awlsam lo tak a ni. Man to man an khel a, kha vang khan goal thumna kan khung thei kha a pawimawh.” tiin a sawi.
Stamford Bridge-ah chak an awm lo
Chelsea in Manchester United an mikhual a, team pahnihten beisei an phak loh ve ve zanah Chelsea an vannei dawn nia a lanlaiin Casemiro hmangin United in an sut a, 1-1 in an inhnehtawk.
Mikhual team United zawk an inkhelh chhungin team langsar zawkah an tang thin a, Chelsea in inkhel thunun an ngai pawimawh a, hlauhawm an siam tam lo.
United substitute Scott McTominay chuan Chelsea substitute Armando Broja chu minute 87-naah foul in penalty a chawi a. Hei hi Jorginho chuan goal-ah a khung.
Blues an lawm hman hle a, mahse tang tluan thei lovin beidawng duh lo United tan Casemiro chuan minute 94-naah Luke Shaw cross chu a tauh lut a. Chelsea keeper Kepa Arrizabalaga in a bengchhuak zo ngang lo.
United tana chanchin lawmawm lo tak awm erawh France defender Raphael Varane inhliam a ni a. Kum 29 mi hi mittui nen lakchhuah a ngai.
Nimahsela Pathianni lama thu a than danin a hliam hi kar li vel chawlh ngai a ni a, World Cup khelh a tan a la beiseiawm dawn niin an sawi.
Reds an tlawm
Liverpool an che fuh tluang hleithei lova, fakawm taka Manchester City an hneh hnuah kaithar Nottingham Forest lakah an tlawm.
The City Ground-ah Forest tan Liverpool striker hlui Taiwo Awoniyi chuan inkhel a goal awmchhun a khung a. Liverpool in nidang pha lo leh hle in an goal hlauhawm chiang ber Virgil van Dijk-a chance a ni a. Forest keeper Dean Henderson chuan Trent Alexander-Arnold lakah huntawp dawn lamah save tha a siam ve bawk.