Mizoram a muaythai inelna lian quarter-final zan hnuhnung ber chu Zirtawpni zan khan neih a ni a. Final luh inchuh a semi-final a inel turte a hriat tawh.
R Dengthuama Indoor Stadium, Mualpui a inlan hmasa berah senior national gold medal paruk la tawh, kum 25 mi Benjamin Zonunsanga’n a tir lamah chet a harsat na a, insiam remin tharuma amah beitu leh muaythai tawn hriat tlachham, kum 17 mi TZ Munga a thunun hneh telh telh a, round hnihna laihawlah a nuai tlawm.
Junior national gold medal pahnih la tawh, kum 18 mi TC Lalrinawma’n beiseiawm takin bul a tan a, ban sei zawk a nihna chhawr tha viau mah se ani aia tawn hriat nei leh national gold medal pali awrh tawh, kum 25 mi Isak Lalruatfela’n nghet takin a khel a; round hnihnaah chungnung zawk a nihna lantirin a khupin a nakah a do a, lehlamin a bei zui thei tawh lo.
Kum 27 mi Ngursaimawia’n thiamna tha tak hmangin ani aia kum kuaa naupang Lalrohlua a hneh a; national pro muaythai champion kawnghren vawi hnih hreng tawh hian minute khat chuang awrh chauh an inbei tihin a ke ding lamin a bekah chiang takin a pet a, chhuatah che chang mai lovin Rohlua a tlu a, bawihsawm zui a ngai.
India rama mixed martial arts champion ni thei, kum 24 mi Zarmawia’n round hnihna atangin tanhmun a siam rem a, a tawp thlengin ngam tak leh hneh takin a nawr. Kum 25 mi Vanlalchhuanga’n round hmasa berah chiang tak takin a hnek a, a hnuah hnek fuh langsar nei zui tho mah se inbeihna boruakah a ngam tial tial a, a inhamtang zo ta lo.
Kum 32 mi Lalchhuanmawia thiamna kawng hrang hrangah theihna tha zawk a nei tih a lantir a, muaythai tawn hriat tlachham kum 27 mi Muanpuia’n lehlam kut leh ke dang hneh lovin round thum tawp lamah Chhuanmawia’n a hnek hnuah a khupin a do a, East Phaileng tlangval a tlawm.