Bay of Bengal chhim chhak lama insiam mek thli chhia (cyclone), ‘Sitrang’ tia vuah chuan naktukah Mizoram rawn thleng ve mai thei a nih avangin ralkhel dar vuak a ni.
Mizoram State Meteorological Centre thupuan danin vawiinah ruah tam tham tak a sur theih bakah naktukah cyclone hian Mizoram a rawn thleng mai thei a. Regional Specialised Meteorological Centre, New Delhi-in ‘special tropical weather outlook’ a tihchhuah atanga a lan danin he cyclone insiam mekah hian Mizoram chu October 25-a a hrut ve theih (cone of uncertainty)-ah a dah a, October 25 hian darkar khata kilometre 45–65 vela chakin thli hi thawk tura ngaih a ni.
He cyclone avang hian vawiinah Mizoram hmun thenkhatah ruah tam tak sur thei dinhmunah a ding a, naktuk leh tuk leh lamah pawh ruah tam tak sur thei a ni bawk.
Sorkar thuneitute chuan cyclone chungchangah hian mipuite chiai lo tur leh thu dik tawk lo thehdarh lo turin an ngen a, cyclone tleh thei tur ralkher dar ngaichanga a theih anga fimkhur turin an ngen.
Aizawl district bawrhsap pawhin mipui hriat tur thuchhuah siamin mahni in leh lote thli leh ruah dawl zo tura a tul anga thawm that ngai laite thawm tha tur te, tui paihna leh tuihawk luankawrte mumal taka siam/thianfai tur te-in a ngen.
Mahni in leh a velah leimin hlauhawm a awm a nih chuan silpaulin/tarpaulin a khuh tha tur leh thing leh mau, thliin a len thluk mai theih, electric hrui delh mai theihte chu kih emaw, a zar emaw thlak turin a ngen bawk.
Thlipui leh ruah vanga êng neih loh theih a nih avangin electric hmang thilte in-charge lawkin, êng awm loh palha êng chhit tur inruahman lawk turin a ti a. Khualzinte tan kawng laka chhiatna thleng palh thei a nih avangin tui thianghlim leh ei tur inruahman lawk theih a that thu leh lui leh tui hmunah te kal loh a him thute bawrhsapin mipui a hriattirnaah chuan tar lan a ni bawk a ni.