Aizawl : BJP Mizoram Pradesh President Vanlalhmuaka chuan MNF party chu Congress party dahthatna atan an hmanrua mai mai a nih thu sawiin, an thawhpui loh chuan an ding chhuak tawh dawn lo niin a sawi.
Inrinnia I&PR Conference Hall, Mamit-a BJP Mamit District executive meeting a hmanpuinaah thu sawiin Vanlalhmuaka hian, central-ah BJP chuan hneh takin sorkarna an chelh mek a, hmar chhak state tam zawkah pawh sorkarna an siam tawh tih sawiin, Mizoramah pawh nakin 2023 MLA inthlanpuiah sorkarna an chelh ve tawh dawn tih a sawi.
BJP chu hnam hnuai hnung zawkte kawng tinrenga duhsaktu an nih avangin, Mizoramah pawh chumi malsawmna chu tun aia nasaa dawn a nih theihna turin a dawhthleng lo siam rem fuh erawh a ngai tih a sawi a. BJP chu eirukna nasa taka dotu an nih avangin India ram mipui te pawhin chumi rah chu kawng hrang hrangin a takin an dawng a, hmasawnna tam tak a hmu ta zel tih sawiin, “Mizoramah pawh BJP sorkar hunah chuan mipui chanai eiru te chu hnungkhirh an nih dawn avangin mirethei ten kan chanvo chan tur a nihna anga kan dawn theih nan hma kan la dawn a ni,” Vanlalhmuaka’n a ti.
Mizoram BJP President hian central scheme tam tak chu state sorkarin anmahni party bil ta emaw tiin, party induhsakna atan hman thin nghawng avangin tunah hian central scheme dawng tur tam takin an dawn loh phah nia sawiin, Central Minister lo kal te pawhin a takin rawn hmu tawhin an lawm lo hle a, hei vang hian central sorkar rin Mizoramin a hlawh thei tawh lo tih sawi.
Vanlalhmuaka hian MNF party hi Congress party dahthatna atan an hmanrua mai mai a ni tih sawiin, “Kan thawhpui loh chuan an ding chhuak tawh dawn lo a, tunah hian state hnufual ber pawl kan nih avangin state dangte ruala kal tur pawhin kan tlai tawh mah mah a; nimahsela, Mizo te chu hnam taima kan nih avang erawh chuan state dang te chu kan la umphak theih erawh ka ring a. Mizoram mipui ten chutiang dinhmun kan luah theih nan erawh mawhphurhna kan nei thung a, kum 2023 MLA General Election ah BJP Sorkarna kan pek erawh a ngai a ni,” a ti bawk.