Aizawl: Mizo National Front (MNF) party-in Inrinni khan an party Diamond Jubilee kharna inkhawm Vanapa Hall-ah an nei a. He huna thu sawitu, MNF President Zoramthanga, chief minister chuan an party chu Laldenga hoa din a nih tirh atangin Pathiana innghat tlat a ni a, Pathian leh ram tan tia a lung pawh phum niin tun thlengin chawh nun zel a la nih thu a sawi.
MNF president, “Kan fel bik vang emaw, kan that bik vang emaw ni lovin Pathian leh kan ram tan tia kan din tlatna hi kan felnaah ruatsak kan ni,” a ti.
Zoramthanga hian Mizote hi Pathianin China ram atangin Burma ram kaltlangin a hruai thla a, chhim, hmar leh khawthlang phaizawl tha tak tak thleng lo chiah siin tuna an awmna ramah hian a dah a. Helai hmuna a dah chhan hi an chhut fo chuan, an chhehvela hnam upa leh sakhaw nghet tak tak nei saten an chimral lohnan Mizo hnam nunna hi Lalpan helai hmunah hian a thukru niin a sawi a. Pathianin Mizote hmangaih taka a hruaina zawng zawng hi MNF that vang emaw, Congress that vang emaw ni loin, vana a lawn dawna Isuan a chah, chanchin tha hril tura he hnam hi a duh vang niin a sawi.
Diamond Jubilee kharna inkhawm hi Vanlalzawma, Vice President in a kaihruai a. Sr Vice President Tawnluia leh MNF dintu zinga ami leh President hmasa ber Laldenga (L) nupui Lalbiakdiki te’n thu an sawi a. Ram leh hnam tana tawngtai rualna hun an hman bakah ram tana martarte sunna hun an hmang bawk a ni.