Aizawl : State level children’s science congress vawi 30-na, ni hnih awh chu kar kalta Zirtawpni khan School education directorate conference hall, Aizawlah khar a ni a, kharna inkhawm hi education Minister Lalchhandama Ralte-in a hmanpui.
State level children’s science congress atang hian National children’s science congress, January 27-31, 2023-a Ahmedabad Science City, Gujarat-a neih tura tel turin Child scientist 8 (senior-ah 6 leh junior-ah 2) thlan an ni a. Senior-ah – Nancy Lalkhawpuimawii, Govt. Saitual HS; VB Khochai Zahneichhua, Lorrain English School, Siaha; T. Lalremsangi, Tualte HS; Valeric JH Lalchhanhimi, Govt. Ruantlang HS; KC Lalpeksangi, Govt. Bethlehem Vengthlang HS leh Lalrinnungi Ralte, Marian HS, Serchhip te thlan niin, Junior-ah – Lalrinzuali Ralte, Saihnuni Sailo Memorial School, Aizawl leh Martina Sonarung, Govt. Middle School-II, Mamit te thlan an ni.
Indian Science Congress, January 3-7, 2023-a RTM Nagpur University, Maharastra-a neih tura tel turin Child scientist 2 – PC Lalremsiami, Buhban Secondary School, Saitual leh Lalnunthara, Govt. Mizo HS, Aizawl te thlan an ni bawk.
District tinah District level children’s science congress buatsaih a nih hnuah State level-a neih leh a ni a, tuntuma state level children’s science congress-ah hian district tin aiawh an tel kim a, school 35 ațangin project 37 entir niin, ‘Understanding ecosystem for health and well-being’ tih thupui behchhanin an thil zir bing te an pholang a ni.
State level children’s science congress kharna inkhawm hmanpuitu School education Minister Lalchhandama Ralte chuan Mizoram sorkarin Science zirna timasawn tura tan a lak dan te sawiin, bilingual textbook tihchhuah a nih tur thu a sawi a. Science leh Mathematics zirlaibu chu țawng pahnih – Mizo leh English-a bu khata siam mek a nih thu leh November thla tawpah tihchhuah hman beisei a nih thu a sawi.