Barcelona tan French forward Ousmane Dembele chuan a thiam thil a lantir a. Goal khat a khung bakah midang goal khung tur zawng siamsakin Athletic Bilbao 4-0 in an hneh.
Pathianni zana Camp Nou a La Liga inkhela an chak avangin Barcelona hian point 28 an hmu a, pahnihnaah an la awm chhunzawm.
Athletic Bilbao manager Ernesto Valverde in kum 2020 January a Barcelona atanga ban a nih hnuah a vawikhatna atan Camp Nou-ah team a enkawl leh a. Basque team hian a hnuaiah season bul tan tha mahse tunhnaia kar li chhungin hnehna chan an nei miah lo.
Barcelona in an formation an thlak a, 4-3-3 atang 4-2-3-1 hmangin French forward Dembele tan chet tlatna tur hmunawl a tam phah.
Minute 12-naah an goal hmahruai a khung nghal a. Minute 18-naah Sergi Roberto pet goal tur siamsak lehin an ‘one-touch football’ khelh nan a pawimawh.
Minute 22-naah Robert Lewandowski khung turin ding lam atangin tha takin ball a tlan luhpui leh bawk a. Second half-ah veilam atang Ferran Torres-a khung tur a siamsak leh.
Barca manager Xavi Hernandez chuan, “Hneh taka ball an chuhna turin na taka mi nawr an tum dawn tih kan hria a, chuvangin a laiah kan insiksawi a ngai a, kha kha a pawimawh hle in ka hria.” tiin a thlirlet.