Aizawl: Chief Minister Zoramthanga chuan Champhai chu buh, thei leh thlai tam tham taka thar chhuahna a nih avangin a pawimawh tih a sawi.
Zan hnih riaka cham turin nimin khan chief minister hian Champhai thlengin, Circuit House-ah Bawrhsap James Lalrinchhana hoin sorkar mi pawimawh tak takten an lo dawngsawng a, an inkawm.
An inkawmnaah Zoramthanga hian khawtlang mipuite leh sorkar hnathawkte chu hmathlir tha tak nen Champhai hmasawnna tura thawk zel tura a chah a. Champhai chu agriculture leh horticulture – buh, thei leh thlai tam tham taka thar chhuah a nih thu a sawi a. Sum tam tak luh theihna turin leilet zau tal an neih chu hmang tangkaia humhalha hmasawn zel a nih theih nan hma la chhunzawm zel turin a chah a ni.
Champhai chu thenawm ram nena inri a nih avangin ram pahnih inkar inlaichinnaah politics a ni emaw, sumdawnna a ni emaw, thil dangah pawh dinhmun pawimawh tak a luah thu chief minister hian a sawi.
He hunah hian Champhai North bialtu MLA Dr. ZR Thiamsanga pawh a tel a ni.