Mikel Arteta pawlten tun season a vawihnihna atan point an hloh a. Southampton nen inkhelin 1-1 in an inhnehtawk.
St. Mary’s Stadium a an result hi Spanish coach chuan an tan zir tur thar a nih thu a sawi.
Saints tan Stuart Armstrong chuan second half-ah goal a khung a. Team goal tha tak hmawrbawktu ah tangin Southampton hi league-ah a zawnin match thum an tlawm tawh lo.
Arsenal tan midfielder Granit Xhaka chuan inkhel tan tir lamah goal a khung a, match hnih chhunga a goal hnihna ni turin Ben White-a ball siamsak chu goal-ah a khung.
Gunners tan forward Gabriel Martinelli chuan chance tha tak a hloh a. Goal nghei tluang rih striker Gabriel Jesus goal khung tur pawh Southampton goalkeeper Gavin Bazunu chuan a lo dansak ve bawk.
Ralph Hasenhuttl-a pawlte hi second half-ah insiamtha in team pahnih an inkhel tawk ta hle a. Goal an khung ve hnuah erawh Arsenal zawkin chakna goal an nei teuh a, Martin Odegaard chuan goal khung mahse ball a out hman avangin pawm a ni lo.
Inkhel zawhah Arteta chuan, “Chak chhunzawm zel kan duh avangin a lawmawm lova, mahse Southampton pawhin fak an phu hle.”
“Chance tha chu kan insiam thei a, mahse kan khung theih loh kha a pawi. Premier League-ah chuan kan chan a that zawk laia kan remchang neihte kan hman tangkai loh hian kan tuar thin.” tiin an chak zawh loh hnuah a sawi.
“First half-ah kan kheltha hle a, inkhel thununtu zawk kan ni. Second half-ah erawh kan tih ngei ngei tur tih loh kan nei thin a, keimahni tan harsatna kan insiam thin.” a ti ve bawk.
Magpies an chak
Premier League club hausa ber Newcastle United in season bul an tan that chu an chhunzawm a. Palina a awm turin Tottenham 2-1 in an hneh.
Tottenham Hotspur Stadium a inkhelah an chak dan erawhin sawizui a hlawh a. Callum Wilson-a goal khungin sawi a hlawh zual.
Spurs goalkeeper Hugo Lloris tihsual zarah Wilson-a’n goal a khung a. VAR hmangin foul leh handball ni thei awm chu en fe a nih hnuah goal-ah an pawm.
An goal hnihna erawh sawisel tur a awm lo. Lloris bawk che fuh lo lehin Sean Longstaff chuan a ball pet chhuah tha tawk lo a dawng a, Miguel Almiron hnenah pe in Paraguay midfielder in goal ropui a khung.
Spurs tan Harry Kane chuan goal khat a khung ve a, hei pawh hi VAR hmangin uluk takin hun rei tak en a nih hnuah an pawm.
Newcastle United hian April 2012 hnuah a vawikhatna atan league-ah game 12 khelh china top four an luah leh hmasak ber a ni.