Aizawl : Zo Re-Unification Organisation (ZORO)-in United Nations Organization day nimin khan an hmang a, Mizorama political party hrang hrang ten an hmanpui.
ZORO General Secretary L. Ramdinliana Renthlei-in a sawi danin ZORO chu khawvel hmun hrang hrang a awm Zofate insuihkhawma, lungrual taka awma, rorelna pakhat hnuaia awm theih na tura hmalatu pawl a ni a. Zofaten an chanvo dik tak an chan theihna tura UNO thlenga ke pen tawh a ni.
L. Ramdinliana Renthlei chuan, “Kum thar (2023) kumtirah ZORO-in Zofa convention a buatsaih dawn a, khawvel hmun hrang hranga Zofate sawmkhawm an ni” a ti a. Chin Lushai conference 1892-a Britsh sorkarin Zofa thendarha awm te rorelna pakhat hnuaia an awm leh theihna tura a lo ruahman a tihpuitlin tak loh chu tipuitling tura ngaihtuah ho turin Zofa convention hi neih tum a nih thu a sawi.
UNO day-a thu sawitu ZORO President R. Sangkawia chuan, “UNO chu October 24, 1945-a khawvel ram hlawm lian ten an din a nih thu sawiin, permanent member 5 an awm thu leh ram hrang hrang 193 an inthlunzawm mek thu a sawi a, UNO-in a tum ber chu indona avanga hreawm taka awm chhanchhuah te, khawvelah remna leh muanna a awm theihna tura hmal- akte, ram rethei khaichhuah te, khawvel ram hrang hrang ten inlungrualna tha leh thawhhona tha an neih theihna tura hmalakte a nih thu a sawi.
ZORO chuan UN session-ah palai te intir thinin, Zo-hnam ziarangte pholan thin a nih thu ZORO President chuan a sawi a. “Kan hnam dinchhuahna tur thahnem tak sawi thin a ni” a ti. Hun lo la kal zel turah ZORO chuan UN session-ah palai an la tir zel dawn tih sawiin, Zo hnam dinchhuah theihna tura hma an lak zel tur thu a sawi bawk a ni.