Mizoram Presbyterian Kohhranin kum 2023-a Puitling Sunday School zirlai bu tur, ‘Kristiante rinna vawnhim’ tih chu a tichhuak.
Presbyterian Kohhran Puitling Sunday School zirlai bu hi Mizo lehkhabu malkhaiah chuan copy chhut chhuah tam ber a ni thin a; kum 2023 atan hian copy 90,000 chhut a ni.
Kum 2023-ah hian Mizoram Presbyterian Kohhran chuan Puitling Sunday School zir tur, ‘Kristiante rinna vawnhim’ tih hi Presbyterian Pastor-te zinga mi thiam, Rev. Rosiamliana Tochhawng, Aizawl Theological College-a zirtir hna thawk mek ziah a ni.
Zirlai buah hian zirlai 46 awmin phek 259 a ni a. Mizoram puma Synod Bookroom zawng zawngah lei theih tura chhawp chhuah mek a ni a, a chhut man Synod-in 25% a subsidised avangin Rs. 110-a lei theih tura tih a ni.
Mizoram Presbyterian Kohhran Puitling Sunday School zirlai bu hi Mizoram Synod hnuaia kohhran zawng zawngte zirlai bu a nih bakah Presbyterian church of Myanmar (PCM) hnuaia Phai Synod pum puiin an hmang thin bawk.
Presbyterian Church of Myanmar leh Mizoram Synod partnership inremna angin Mizoram Synod chuan kum tin copy 1,000 a thlawnin pe thin a ni.
Puitling Sunday School zirlai bu thar bakah hian Synod calendar, a phek keu ngai chi pawh peih fel a ni tawh a, tun atanga rei vak lovah 2023 Nilai leh Beihrual thupui bu bakah Naupang Sunday School zirlaibu thar lo chhuak leh tura beisei a ni bawk.