Higher & Technical Education Minister Dr R Lalthangliana chuan, “Pathian hian malsawmna min pek dawn chuan retheih leh thawhrim hmasak a ngai a ni,” a ti.
Nimina Students’ Self Support Union (SSU) Gen. Hqrs.-in Hnahthiala General Assembly vawi 35-na leh Vangpui Kût an hmanah khuallian niin a hmanpui a. Thu sawiin, SSU thupui, ‘Kuthnathawh chawisan’ tih leh ‘Zirna atana mahni intodelh’ tih chu a tawnhriat nei tawhna leh a thupui ngaihsan thin ber a nih thu a sawi.
“Kan lehkha ve zir hun lai khan pheikhawk pum pawh kan nei pha lo a, slipper kan bun a, hna hi kan thawk nasa em em thin. Kei pawh high school ka kal laiin lo ka nei a, chhipin ka phur zo vek thin. Veng mawng chho lutuk atangin zing karah vawi 10 chuang tui ka kawt a, gas a la awm loh avangin thal chhungin kum khat daih thing ka pu khawm thin a, bati êngah zan reh tak tak thlengin lehkha kan zir thin a, Zotlang Lungleiah hetiang hian lehkha zir pahin hun ka hmang thin,” tiin hetiang a tawnhriat a ngaihtuah letin inchhirna a neih loh thu a sawi a, Pathian hian malsawmna a pek dawn chuan retheih leh thawhrim hmasak a ngai tih a sawi.
SSU thuvawn (motto) ang hian ‘Kuthnathawh chawisan leh zirna atana mahni intodelh’ tih vawng zel tura chahin, “Kei pawh hian M.Phil leh Phd pawh hi a zir hun chhung zawh an tih hmain ka zo hman a, ka zir hun lai khan ni khatah darkar thum aia tam ka mu lo hrim hrim,” a ti.
He hunah hian T. Lalmuanpuii, Chairman, MC Apex Bank Ltd. chu khualzahawm a ni.
Vangpui Kûtah hian Hnahthial DC R.Lalremsanga chu Kût Pa a ni a, Holy Heart School Principal Lalbiakzami chu Kût Nu niin, Lalhmachhuana Zofa, Diktawn Editor chu resource person a ni.
Hun hi Johan Lalremruata, Vice President, SSU GHQ-in a kaihruai a, President Lalawmpuia pawhin thu an sawi.
&&&&&