YMA Sub. Hqrs. Lunglei chuan Aizawl-Thenzawl-Lunglei (ATL) Road siam that phuta lungawi lohna lantira ‘No Vehicle Day’ an hman pawhin awmzia neia a lan loh avangin tun thla chhung sorkar ngaihchan a, mawhphurtuten hma an la lo a nih chuan an thiam anga hma lak an rel.
Thawhtanni zana YMA Sub-Hqrs Lunglei Executive meeting chuan ATL Road kawng siam that phuta lungawi lohna an lantirin awmzia a neih loh thu leh, an beisei angin mawhphurtute atangin thu hla engmah an dawn loh bakah, kawng siamnaah pawh bul tanna hmel rintlak hmuh tur a awm loh bawk avangin tun thla sorkar ngaih chan an rel a. October 31, 2022 hian kawng siam thaa hmalakna awm leh awm loh leh, hmalakna rintlak a ni em tihte a hmunah kawng chhe lai en nise tiin, duhthusama hmalak a nih loh leh mawhphurtute hnen atanga thu leh hla engmah hriat a nih loh bawk chuan kawngpui tha an neih theih nan an thiam angin hmalak an rel a ni.
YMA Sub, Hqrs Lunglei chuan an thiam anga hmalakna hi thleng lo hram se an duh tih sawiin, hmalak a lo ngai ta a nih pawhin mipuite puihbawmna leh hriatthiam an ngen tih an sawi.
Thuchhuah an siama an tar lan danin YMA Sub. Hqrs Lunglei hian, ATL Road siam tha tura ngenin June 2, 2022 khan Chief Minister Zoramthanga an lo sawipui tawh a, September 25 & 28, 2022 khan chhim lam MLA-te an lo sawipui tawh bawk a, July 27, 2022 khan PWD hotute he kawngpui siam tha tur hian an lo dawr tawh bakah August 27, 2022 khan chief minister hnenah kawngpui tlo zawk a awm theih nana hmalaksak tura ngenna lehkha an pe tawh bawk a ni.