Tualte khua in nimin khan Tualte YMA hall-ah Tomato kutpui an hmang a, he hun hmanpuitu Deputy Chief Minister Tawnluia’n a hmalaknaa Tomato sawrna khawl bun leh Tualte Tomato growers’ co-operative society ltd. (TTGCS)-in an siam Tomato ketchup a tlangzarh bawk.
Deputy Chief Minister hian Tualte khuain a hminga Tomato huan an siamsak leh Tualte khuaa Tomato chingtute tana Horticulture department-in Tuikhuah an siamsak pawh a tlawh a. Horticulture department hmalaknaa tui litre nuai 1.3 leng siam a ni chu lawmawm a tih thu leh tuizem dang, tui litre nuai 1 vel tal leng siam belh tura hma a lak tur thu a sawi a. A panna kawng pawh thallaia siam dan ngaihtuah a nih tur thu a sawi.
Tualte Tomato ketchup pawh dan ang thlapa bazar a hralh chhuah thei tura tlangzarh a ni ta chu lawmawm a tih thu Tawnluia chuan sawiin, Tualte Tomato ketchup a tui a, a eitlak a, a tha a, Mizoram thar a ni bawk tih mipuiin an hriatna tura vawrhlar a tul thu leh a vawrhlarna atana a MLA puite pek tur pawh a hawn tur thu a sawi bawk.
Tawnluia chuan Tualte khuain kuminah Tomato hralhna atanga cheng vaibelchhe 2 chuang an lakluh tawh thu leh Sialhawk pawhin Lakhuihthei hralhna atanga cheng vaibelchhe 1 dawn an lei tawh thu sawiin, kum tharah Chawngtlai leh Khawhaiah te Saptheiah beihpuithlak an tum thu a sawi a. “Mizoram sorkarin loneitute tan eizawnna ngelnghet siamsak a tum a ni” a ti.
Dy CM chuan Tualte khuain a puala Tomato huan an lo siamsak chu lawmawm a tih thu leh a huana Tomato thar hmasaber zawng zawng chu Tualte Tomato growers’ co-operative society hnena a hlan vek thu a sawi bawk.
TTGCS hruaitu ten an sawi danin, Tualte khuaah hian kum 2018-ah KVK hmalaknain Tomato chin chhin a ni a, 2019-ah Tualte Tomato Growers association dinin, Horticulture department leh KVK hmalaknain chhungkaw 24-in Tomato chu eizawn nan an ching tan a. Tomato chingtu pung chho zelin, 2021 kumtawp lamah Tualte Tomato Growers Association chu Tualte Tomato Growers Cooperative Society Ltd. tia thlak a ni a. Society hnuaiah hian Primary agriculture credit society kalpui niin, Tomato chingtu chhungkaw 223 chu Society-ah hian chanpual neiin an awm mek.
Kum 2019-a Tomato chingtu chhungkaw 24-in grade A atangin Rs. 15,00,000 leh grade B atangin Rs.45,000 an lei a. Kum 2020-ah chhungkaw 60-in grade A atangin Rs.59,50,000 leh grade B atangin Rs. 75,000 an lei. Kum 2021-ah chhungkaw 135-in grade A atangin Rs.2,53,90,000 leh grade B atangin Rs.6,42,000 leiin, kuminah chhungkaw 223-in tun thla ni 23 thleng khan grade A atangin Rs.2,74,33,602 leh grade B atangin Rs.3,02,740 an lei tawh a. Kum 2019 leh 2022 inkarah Tomato hralhna atangin Rs. 6,13,38,342 hmu tawhin, Tomato hralhna rate tlangpui grade ‘A’ Kg-ah Rs. 45, grade ‘B’ Kg-ah Rs. 20 a ni.