ZPM Working President K Sapdanga chuan kum 2023 MLA thlanah ZPM-in a hlangin kalphung thar sorkar siam an tum tih a sawi.
Thawhlehnia Lawngtlai Areopagi-ah ZPM Lai District Headquarters chuan mi thar lawm luhna leh vantlang inkhawm a buatsaih a. He hun hi ZPM working president chuan hmanpuiin thu a sawi a. “Lai district-a ZPM meichher chhitute kan chhuang hle che u a, chhim tawp atanga ZPM meichher chhem alh tak tak turin kan ring tawk che u a, in zarah ram pum a kang duai duai ang tih kan ring. Kum 2023 MLA thlanah ZPM-in a hlangin kalphung thar sorkar siam kan tum a, Laifa an tel ngei tur a ni. MLA pangngai lo deuh turte pawh kan lo beisei dawn a ni,” a ti.
K Sapdanga hian project lian tak tak, Chamdur Project, Kolodyne Multi Modal Transit Transport Project leh Mampui Airfield Project te hi sorkarin a muthilhsan chu mak an tih thu a sawi a. ZPM hun a thleng a nih chuan Mizoram hian ‘Look South Policy’ a kalpui lo thei lo tih sawiin, “Buh kan ei duh chuan Chamdur project kan hawisan thei lo, electrict kan duh chuan kolodyne hydel project kan hawisan thei lo, Asia chhimchhak ram te nena insumdawn tawn kan duh chuan KMTTP kan hawisan thei lo. South East Asia sumdawnna hmun pawimawh zingah Lawngtlai a tel ang. A lut lam kawtchhuah mai ni loin, a chhuak lam kawtchhuah a ni tel lo thei lo,” a ti.
Mipuiin ZPM sorkar an nghakhlel tih sawiin, a nghakhlel ber tur pawh Lai district mipuite nia a hriat thu sawiin, “Chutianga hmasawnna hna thawk tur chuan MLA pahnih kan thawh dawn ni pawhin kan hria,” a ti a. ZPM chu an kalna apiangah an sorkar dawn tia mipuiin an sawi thin tih sawiin, nakkum inthlan lo awm tur hi hun dang ang lo takin neutral leh sorkar hnathawkten an nghakhlel a, hengho hi party-ah an tui thar thut tihna ni loin, sorkar kalphung an en a, an tan hei aia mangan ngaihna a awm tawh loh vang niin K Sapdanga hian a sawi.
F Sangdawna, Senior Vice President kaihruai vantlang inkhawmah hian ZPM working president-in an party-ah mi thar eng emaw zat a lawm luh a. K Sapdanga hi Lalchhuanthanga, MLA; General Secretaries – Lalmuanpuia Punte, Saithuama leh hruaitu dangten an tawiawm a ni.