Mizorama lirthei leh a kaihhnawih dan bawhchiate hremna dan ennawn, The Motor Vehicle (Amendment) Act, 2019 hman tan thla, kumin September khan dan bawhchhia sum chawi tlingkhawm Rs nuai 12 a tling a, dan thar hman hma chiah thlaa dan bawhchhiate sum chawi tlingkhawm aia a punna Rs nuai 7 chuang a ni.
Kum 2019-a Motor Vehicle Act enawna siam that chu September 1, 2022 atang khan Mizoramah hman tan a ni a. Aizawl traffic police-in hemi thla hian dan bawhchhia lirthei 1789 manin an sum chawi tlingkhawm chu Rs 12,75,500 a tling a ni.
Dan siam that hman tan a nih hma, August khan dan bawhchhia lirthei 1,899 man niin, dan thar hman tan thla nena khaikhinin dan bawhchhe man chu 110-in an tlem zawk a, August-a dan bawhchhia mante sum chawi tlingkhawm Rs 5,05,100 niin, August aia September-a dan bawhchhiate sum chawi punna Rs 7,70,400 a ni.
Aizawl traffic police-te chuan thla khatah dan bawhchhia lirthei sang chuang an man ziah a, kumina dan bawhchhia lirthei an man tam ber thla chu July kha niin, lirthei 1,990 an man a, dan bawhchhe man tlem ber May thlaah erawh lirthei 1,289 an man thung.
Traffic police-te chuan kumin January atanga September thleng khan dan bawhchhia 14,634 an man tawh a, an mante sum chawi tlingkhawm Rs 53,35,100 tling tawhin dan bawhchhe zinga tam ber chu two wheeler an ni a, 10,109 lai niin a dawttu LMV a ni a, 3,265 man an ni.