ZPM Working President K Sapdanga’n kum 2023 MLA inthlanah Aizawl khawpuia bial 11 lak vek theih an inbeisei thu a sawi.
Tunkar Nilainia ZPM Siaha district-in an pisa-a mi thar lawmluh inkhawm an buatsaihah he thu hi ZPM Working President chuan a sawi a. Mizoram politics chanchinah party pakhat a chhoh chuan a dang pakhat a chhuk a ngai a, a rualin party pahnih a than theih loh nia sawiin, ZPM chu a chho mek niin a sawi.
Thalai ten beiseina sang tak nen ZPM an tinzawn nia a hriat thu sawiin, K Sapdanga chuan ZPM chu ruling emaw an tih hial tawh avangin party dangte chu ZPM sawi bawrhban lamah an ramtang a, beih tur an insem niin a sawi a. “Zoram vantlang hawiher thlirin, inthlan lehah chuan mipuiten ZPM sorkar an tinzawn a, a chhan chu tun aia tha zawk Mizoram an beisei a ni,” a ti.
COVID19 chhuanlam dik tawk lo a tam nia sawiin, ZPM Working President chuan “Mizorama sum lut a tlem chuang lo va, a luhbingna erawh a awm, Kamrula’n harsatna a tawk ve ngai lo, chutihlaiin pensioner te, sorkar hnathawkte leh mipuiten kan tuar a; zan thim hnuaia mangchhe mang mangang ang chauh kan ni,” tiin, mangangte inhlawmkhawm chu an kalkhawm a, an insawmkhawm hnuah ZPM a piang ta niin a sawi bawk.