Kuhva hralh kawnga harsatna tawk mek, Hachhek Bial Kuhva Chingtu Pawl (HBKCP) leh Hachhek Bial All NGO-in vawiin atanga tiamchin awm lova Hachhek biala total bandh kalpui an tum chu sorkar lam ngenna avangin Pathianni zanlai thlenga sorkar ngaihchan an remti a, sorkar atanga thu lawmawm an la dawng lo fo a nih erawh chuan November 1, 2022 atangin total bandh kalpui an tum.
An kuhva tharchhuah hralh kawnga an harsatna tawhte sukiang tura sorkar an beiseinaah tun thlenga an beisei anga sorkarin hma a laksak loh avanga total band chu huaihawt tum an nih thu an sawi a. Sorkar kum kal mek (2022-2023) chhunga Mizoram sorkarin an harsatna a sutkiansak thei dawn lo a nih chuan zangnadawmna atan kum kalta lama an kuhva hralhna man zat, Rs. nuai 2,750 chu kuhva chingtute hnenah kumin chhung ngeia pe turin an phut bawk.
Hachhek biala kuhva chingtute chuan kumin June 6-ah Chief Minister Zoramthanga hnenah an harsatnate hmaichhanah an thlen tih sawiin, June thla ral hma ngeia hma la turin an ngen a. July 15-ah home minister leh soil minister te hnenah an harsatna ziaka thlen lehin, home commissioner & secretary pawh hmuin, an harsatna chu thlen mah se, tun thlengin an beisei ang hmalakna hmuh tur leh hriat tur a awm lo niin an sawi.
Jt. group YMA study team hmalaknain kumin vek September 2-ah Assam Chief Minister Himanta Biswa Sharma hmuh a nih thu leh hemi thla vek ni 5-ah Mizoram chief minister pawh an hmuh nawn leh thu an sawi a. Hemi thla vek ni 4-a ramri chungchanga Assam leh Mizoram chief minister te Delhi-a inbia pawhin kuhva chingtute harsatna sutkian dan tur chu an sawi niin sorkar thuchhuah chuan tar lang mah se, tun thlengin hmasawnna an la nei chuang lo nia sawiin, ram dang kuhva tawlhruk chu dan lova kalpui la ni rengin, hei hian an tan harsatna a la siam reng niin an sawi bawk.