Hrangturzo bial fanga feh chhuak mek, ZPM Leader Lalduhoma hian an party-in sorkarna siam turin mihring lama inbuatsaihnaah chuan an inpeih tawh tih a sawi.
Nilaini zan khan Biate-a Zialung Community Hall-ah hun a hman zawhah nimin zing khan East Lungdar Bazar kawnah vantlang inkhawmah thu sawi lehin Lalduhoma hian, tunah hian mihring lamah chuan sorkarna siam turin theih ang angin an inbuatsaih tih sawiin, “Kan mi thiam rualte nen ni za (100) chhunga kan tih tur te, kum khat chhunga kan tih tur te, kum hnih chhunga kan tih tur te kan duang lawk vek tawh a, mihring lama inbuatsaihnaah chuan kan inpeih tawh a ni,” a ti.
Lalduhoma hian mi tam takin ZPM hi beiseina awm chhun a ni tih hriain ZPM-ah an lut zel tih a sawi a. Congress hun a liam mek tih sawiin, “Party hian ral lam an pan tawh chuan engmah khelh chhuah tur a awm tawh thin lo,” a ti a. Congress chu party hlun leh ropui tak an ni a, an thiamnate, an ngaihtuahna leh ram tana an lo sen tawhnate ZPM kaltlanga tihlawhtling tur leh thawhpui atan a sawm tih a sawi.
Party thenkhatin Mizoramah ZPM a sorkar chuan ram a intodelh ang tiin an tan hun tha a awm tawh lo ang tih an hlau nia sawiin, “Chung mite chuan nasa takin min bei mek a, kan pawlah pawl hrang hrang a awm angtein an sawi mek a ni. Mahse, keini chuan ‘Mizoramah hian Pathian ram lo thleng rawh se’ tiin kan au thin a ni,” a ti.
ZPM leader hian hmasawnna ruhrel, tlo leh daih rei din hi an ngai pawimawh tih sawiin, ZPM sorkar hunah ram changkang zawkten an ngaih pawimawh zirna leh hriselna hi anni pawhin an ngai pawimawh dawn tih a sawi bawk.