MNF Adviser Dr R Lalthangliana, Health Minister chuan Mizoram hi Mizote ta a nih thu leh Mizo nationalism hi thangtharten an chawisan zel a tul tih a sawi.
Nimina Ramhlun Indoor Stadium-a ‘V’ Battalion din cham lawmna hunah khuallian niin Dr R Lalthangliana’n a hmanpui a. Thusawiin, Mizoram tana hnam pasaltha, an nunna hlu tak chan te, in leh lo chante kha an ngai hlu tih sawiin, “Mizo hnam tana bul min tan saktu, hun khirh leh harsa tak kara kan hnam min phochhuaktu Mizo Hnam Pa Pu Laldenga kha zahna chibai kan buk a. Hnam dangte laka min chimralna tura hmalatu niin, Mizo hnam veina thinlung pian chhuahtirtu a ni. Kan hnam pasalthate kha an ngaihhlut awm em em a ni,” a ti.
MNF Adviser hian MNF kha an in-surrender lo a, tam takin in-surrender-ah puh mah se inches khat pawhin an la tawlh lo niin a sawi a. “Vawiin thlenga Hnam Movement hruaitu min la dampui rengtu Pu Zoramthanga, Pu Tawnluia leh mi dangte hi an hlu em em a, ngaihhlutna chang i hria ang u, vawiin hian zahna chibai kan buk nawn leh a ni. Mizoram hi Mizote ta a ni a, Mizo nationalism hi thangtharten chawisang zel ang u,” a ti bawk.
Khualzahawn ‘V’ bn. zinga mi Er. K. Lalsawmvela, MNF Adviser leh Adviser to Chief Minister (Tech) leh, R. Tlanghmingthanga, Ex-Minister, MNF Adviser pawhin he hunah hian thusawiin an hmanpui bawk a ni.