Excise & Narcotics Department chuan methamphetamine an man a. CADS nen ruihhlo leh a khawihtu thahnem tak an man tawh.
Ningani chawhnu dar 1:30 khan END hian Tlangcheng, Zote khaw dai, Champhai-ah Khawchhak lam atanga dan loa lak luh, Dagon beer can 792 zet an man a. Hemi rual hian beer case chhunga thuhruk methamphetamine kg 34 & 650 gram (tablet 3,15,000) an man.
Heng methamphetamine phurhna atana hman, TATA LPK Truck MZ04-A/2476 pawh hren a ni. Methamphetamine neitua puh mi pali – Lalhmangaihzuali (30), Electric Veng, Champhai; Zaithanchhunga (35), Vengthlang, Champhai; Malsawmdawnga (18), Champhai Vengthar Tlangnuam leh Hualsawmchina (25), Champhai Vengthar Tlangnuam-a khawsa nia inchhalte chu man an ni.
END leh CADS thawk dun chuan Zirtawpni zing dar 9:15 khan Electric veng, Power House Maxi Cab Stand-ah heroin gram 56 (hawng 4) leh a neitu nia puh – Celena Lalruatkimi (21), Chawlhhmun leh Lalthazuali (25), Luangmual, Chhangurkawn-a khawsa nia inchhalte an man bawk.
END leh CADS thawk dun hian thawhhona tha tak neiin, September 9, 2022-a CADS din atang khan heroin kg 3.066 leh methamphetamine tablet 10,153 bakah mihring 88 an man tawh a ni.
Ruihhlo vanga mante hi dan tlawhchhanin thubuai siamsak an ni a, court-ah thawn nghal an ni bawk.