MZP Assembly vawi 66-na, Darzo khuaa Liandala Run-a neih zawh taka rorel palai ten Mizoram sorkar enkawl zirna in hrang hrang fee kalphung ennawna, a tam thei ang ber zirnain hmasawnna atana hman a nih theihna tura hmalak rawtna an pawm.
MZP khawmpui chuan post matric scholarship-a Mizoram sorkar tum ve tur (state matching share) a hun taka pekchhuah a nih theihna tura hmalak rawtnate, Mizoram sorkar hnuaia college hrang hrang te Bus mamawh sorkarin a ngaihtuahsak theihna tura hmalak rawtna leh RUSA kaltlanga college hrang hrang sakthat/thawmthat te a hun taka zawh a nih theihna tura hmalak rawtna te pawh an pawm.
Mizorama NHIDCL hnuaia kawng laih hnathawh mekte a nih dan tur dik taka thawh a nih theihna tura enfiaha hmalak rawtna pawh MZP khawmpui chuan a pawm a. Mizoram sorkar hnuaia hna lakah Mizo tawng ‘middle school standard’ tih pawh exam a nih ngei theihna tura hmalak rawtna te, Mizorama insuarance company ten insuarance diltute hnenah harsatna an siam fo chinfel a nih theihna tura hmalak rawtna te an pawm bawk.
MZP khawmpui hi a tiak ni, Ocotober ni 27 khan Education Minister Lalchhandama Ralte-in hmanpuiin, HIV lakah te, ruihhlo lakah te fihlim turin zirlai te a chah a. Aia upa zah kawnga tanlak thar a tul thu pawh sawiin, Mizo nationalism, hnam hmangaihna rilru pu thar tur pawhin zirlai te chu a chah.
Ruihhlo a hluar thu sawiin, Education Minister chuan “middle school kal chinah te pawh ruihhlo a hluar hle tawh” a ti a. Ngaihtuahna tizauva, aia upa zahna zir thar chunga fate zirtir thar turin nu leh pa te pawh a ngen a. Skill development leh sports kalkawptir zawngin sorkarin hma a la tan tih sawiin, zirlai pakhat ni tura sorkarin hma a lak chhoh mek thu a sawi bawk. mawp mawp thu a sawi bawk.