ZPM Leader Lalduhoma’n party sorkar ni loin, mipui sorkar an din dawn niin a sawi.
Hrangturzo constituency huam chhunga khaw hrang hrang fang kual mekin Lalduhoma hian nimin khan Leng, Sailulak leh Mualcheng khuaah te vantlang inkhawm buatsaihah thu a sawi.
“Pathian leh mipui zara sorkarna kan siam a nih chuan power kan ngai pawimawh em em dawn a. Kan policy tam tak pawh hi power tel lo chuan a tihhlawhtlin theih loh a ni,” a ti.
Lalduhoma hian, “Hand holding policy kan nei a, chhungkaw tinten hmuingilna bik thil kan nei theuh a; mahse, bultanna kan nei si lo a, kan tih theih kan thiam ve reng kha kan ti thei lo thin a ni. Chutiang mite chu party sawi loin mi taima dinchhuah tum kha kan pui mai dawn a ni,” a ti a; party sorkar ni lo, mipui sorkar an din dawn avangin mi taima leh puih tlak, mi tumruh leh hlawhtlin tum ngeite chu party sawi loin an pui dawn tih a sawi.
“Mizoram ei chhetu ber chu eirukna a ni,” tiin ZPM leader hian, MLA hlawh atang hian in tha tak tak sakte, in hmun tha tak tak lei te hi a theih loh niin a sawi a. “Term khat MLA te, term khat minister-ten in tha leh ropui tak tak an sak hian mipui chanai an ei a ni. Kan chanai eiru duhte hian kan ram hi an ei chhia a, hetiang mi hi vote lo ngam turin kan in chah duh a ni,” tiin, an sorkar atangin ni 100 chhungin ram hmelhmang thlak an tum thu leh, mipui mimirten politician an thlir dan hi thlak danglam theih an inbeisei niin a sawi.
Sem policy tichhuaktuah Congress party puhin, “Sem policy hi a tir atangin inbumnain an tan a, min bumtu ngai hi kan inbumtir mai mai thin a, tunah chuan kohhran a au chhuak ta hial a nih hi,” a ti.
&&&&&