Youth for Environment Justice Mizoram (YEJM) hruaitute chuan Larsap Hari Babu Kambhampati chu nimin khan Raj Bhavan-ah an kawm a, dan loa ramsa tawlhruk Mizoram chhunga mante lo enkawl lailawkna tur siam thuai a nih theih nana hma laksak turin an ngen.
YEJM hruaitute chuan tunlaiin ram pawn lam chauha awm, ramsa thenkhatte chu Mizoramah dan leh thupek kengkawhtuten man an nei tam tawh hle tih larsap chu hrilhin, ramsa mante lo enkawl lailawkna erawh duhthu a sam lo takzet tih an sawi.
Ramsa hren lailawkte chu bawm te tak têah te, sahuanah leh a remchang changah duhdah takin khung an ni thu larsap hnenah hian sawiin, “Chaw tha leh an mamawh ang chite pek a nih lo a, ramsa mankhawmte hian hri leng lo keng lut thei an ni a, Mizoram chhunga ranvulhte leh ramsate tan hri tha lo an rawn pu lut thei,” an ti.
Tuna enkawlna pek an nih dan chu a him lo va, Aizawlah leh Champhaiah heng ramsa mankhawmte lo enkawl lailawkna chu siam thuai a ngai tih thu YEJM hruaitute chuan larsap hnenah sawiin, hemi chungchang hi hemi kaihhnawih department hotute sawipui turin larsap chu an ngen.
He an inkawmnaah hian larsap leh YEJM hruaitute chuan environment tihchereuna lam hawia hmalakna thenkhat leh larsap inrawlhna tura an ngaih laite pawh an sawipui bawk.
Larsap Kambhampati chuan Mizoram thalaite zingah leilung leh boruak tuamtu chhe mek zel veia a siam that hna thawk tura pen chhuak an awm belh mek chu lawmawm a tih thu sawiin, enrvironment chhe mek chu khawvelin a manganpui mek a, Mizoramah pawh changkanna leh hmasawnnain a ken tel thil thenkhat avanga environment chhe mekte siam that ngai a awm nual tih a sawi.
YEJM member leh environment humhalh kawnga tui thalai rualte chu vawi khat chauh hman theih sarang hmang lo tura mipui zirtirna pea tan la zel turin a chah a, a hmatawnga hmalakna atan luikawr leh lui dunga sarang lam paih tihtawp a nih theih nan chak taka hmalak a pawimawh tih a sawi bawk a ni.