Sorkar hnathawkte medical bill anga healthcare scheme kalpui tum


Indian Medical Association, Mizoram State branch-in nimin khan Aijal Club-ah Annual Conference vawi 45-na hmangin, golden jubilee an lawm nghal a, he hun hmanpuitu, Chief Minister Zoramthanga’n state healthcare scheme chu sorkar hnathawkten an medical bill an kalpui anga kalpui theih tuma hmalak a nih thu a sawi.
Chief minister chuan State Health Care Scheme chu tlin lo chunga an kalpui tang tang nain rah tha tak a la chhuah zel an beisei tih a sawi a, “Health care atana sum awm sa kan puk belh tur nen kan tihpun chhoh a, state ram sum leh pai dinhmun a that chhoh bawk chuan sorkar hnathawk bill theih dan nen inang veka kalpui theih hram dan kha tumin hma kan la,” a ti.
Health care scheme hnuai damlo inenkawlna senso leiba chungchanga politics-a an beihna thin chungchang sawi bawkin, sawiselna nasa tak karah mipui tan a that em avangin tlin lo chung chunga an kalpui thu a sawi a, “Kan tlin kan ti miah lo, ba pawh kan ngah,” a ti a, bill bate chu theihtawp chhuah an rulh mek thu a sawi.
Zorama chuan health care scheme atana hman tura Asian Development Bank atanga loan puk tur chungchang sawi bawkin, “Rs vaibelchhe 100 kan dil a, department of expenditure-in loan puk min phalsak tawh bawk a, tunah hian a kal mek a, a hminin a lo thleng leh lek tawh,” a ti.
Zoram Medical College enkawl sak tura sorkar laipui an ngen chungchang sawi bawkin, ZMC enkawlna sum leh pai tumsak tur an nawrna chu vawi leh khata puitlin mai pawh har tak a nih thu a sawi a, sorkar laipui hotuten an lo hnial thlak hrehawm khawpa zuk nawr dan turte pawh a ngaihtuah chho zel thu a sawi.
Hetianga ZMC enkawlsak tura an nawr mek lai hian sorkar laipui lam hian Lengpui Airport chu an kuta dah turin an lo nawr ve chhen tih a sawi bawk a, “‘ZMC min enkawlsak rawh u,’ kan ti a, anni lamin kan airport min dil ve thung a, airport erawh state-in a enkawl rih hi kan duh dan a ni,” a ti.
IMA, Mizoram state branch-in kum 50 hmel a lo hmu ta chu lawmawm a tih thu sawi bawkin, doctor-te chu an hlut chhung a rei a, sorkar atanga an pension hnuah pawh mipuiin an la mamawh zel tih a sawi rualin mi dang tana malsawmna nih zel tum turin a fuih bawk.
IMA, Mizoram State Branch Annual Conference hi chawhma hun hi an president, Dr John Zohmingthanga’n a kaihhruai a, pawl ziaktu leh sum enkawltuten report an pek bakah an member boral, Dr Thangchungnunga sunna hun an hman bakah doctor rualten thu tiam an sawi rual a, IMA hruaitu lo ni tawhte hnenah chawimawina thu ziak hlanna hun hman a nih bakah golden jubilee puala buatsaih souvenir chu khuallianin a tlangzarh bawk.
IMA, Mizoram State Branch member-te hian nimin tlai khan Aijal Club park-ah golden jubilee lawmna hun an hmang chhunzawm nghal a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427