Indian leh Chinese sipai commander lawkte chuan Inrinni hian thla 14 vel zet ram pahnih inkara Ladakh sector-a inhriat thiam lohna ching fel turin a vawi 12 nan an inbe leh dawn.
Indian Army leh Chinese People’s Liberation Army (PLA) commander inbiak hi Line of Actual Control (LAC)-a Chinese lam, Moldo-ah chawhma dar 10:30-ah an tan dawn a. Inbiak hnuhnung ber kha April 9-a neih a ni.
“Tun tum inbiaknaah hian Hot Springs leh Gogra vela inhriat thiam lohna awmte chin fel theih a nih kan beisei,” tiin thuneitu sang pakhat, a hming tar lan duh lo chuan a sawi.
Ladakh khawchhak lama Indian leh Chinese sipai buaina hi nikum May vela intan tawh kha niin LAC-ah hian inhmelma sipaite hian an ram inchuh atangin awmhmun an sawn duh lo ve ve.
Nikum June 6 atang khan Indian Army leh PLA commander-te hian inbiakna tanin vawi 11 an inbe tawh a. Eng emaw chen chu boruak tha lo a tireh phah.
Inbiak hlawhtlinna lian ber chu vawi kua an inbiak hnua February thla laihawla Pangong Tso sector-a ram pahnihten an sipai leh an hmanruate an sawn hlat hret ve ve kha a ni a. Hot Springs, Gogra leh Depsang vela inhnaih taka an la awm chu inhlat tura inbiakna hi kalpui zui zel a ni.