Barcelona striker Robert Lewandowski chuan minute 93-naah chakna goal a khung a. La Liga a table chung ber luah lailawk turin 1-0 in Valencia an hneh.
Inrinni zana Mestalla Stadium a inkhel hi goal lut lovin a zo dawn niin a lang hman. Mahse huntawp hma chiahin Barca forward Raphinha chuan penalty area chhunga ball a vawrh lut a, he ball hi boruakah Lewandowski chuan thai lutin tun season-ah league goal 13 a khung tawh.
Mikhual team Barca in chance thahnem tak an insiamna inkhelah hian Valencia tlarhnung in an dang hnem a, an goalkeeper Giorgi Mamardashvili pawh a che tha.
Tun kar liamta a UEFA Champions League a tla fel Barcelona coach Xavi Hernandez chuan, “Kan tan chak a pawimawh a, huntawp dawna han chak chiah phei hi chu a pawimawh leh zual. Kan beidawng miah lova, mahse han zam deuh lai chu kan nei. UCL atanga tlak khan min nghawng ve a ni.” a ti.