- Lallunghnema, Charity Lodge
Kan sitting rooma bulb thlakna tur ka lei a. He Dawr nghaktu chuan Cash Memo rilru khawih tur tak mai min pe a. Chu Cash Memo a thu chuang chu hei hi a ni “Always inspiring” tih hi. He thuziak ka hmuh rualin ka rilru a khawih zar mai.A thu awmzia nia lang chu,’customerte tithathotu,tiphurtu kan ni reng e.Min dawrtute an inchhir ngai lo,’tihna a ni thei mai awm e.
Cash Memo ka hmuh pakhat ve thungah chuan,’Consumer’s Satisfaction is our Motto,’tih hi a chiang bawk a.Mahse heng thu thlum tak tak,
Always inspiring !
Customers’ satisfaction !
tihte hi ni thin mahse,customerte leh sellerte hi an inlungrual a ngai a ni.
Heng Cash Memo-te hi mawiin hmuhnawm viau thin mahse, inbumna kawng a inhawng zau em em thin a. Dawrkaite hian an zir chuan si loh chuan engmah lo mai mai a ni ang. Darben thek pawh an tluk kher lovang.Chutiang bawk chuan consumerten an zir a tul hle.Consumer fel leh hawihhawm tak nih a tul a ni.Hawihhawmna hi mi zawng zawng mamawh a ni.
Dawrkai tam tak chuan mi hip nan fak mawina thil tar an uar hle a.Thu ziak mawi tak tak, infak mawina chi hrang hrang an cash memo leh thil funahte chuan an ziak chiai chuai thin.Heng zawng zawng hi intihderna leh consumerte an veh thlemna mai chauh a ni. An customerte chu thil tha tam tak tihsak an tiam a.Free gift an tiam a,pek pawh an pe ngei mai.Mahse,an thil zawrhte chuan belh chian a dawl lo fo bawk.Inbumna dik tak a ni.Consumer tam tak chuan mamawh vang ni lovin free gift it vangin an mamawh lem lo thil an lei thin.Hei hi thil chin tha lo tak a ni.A lo thlawna pawisa senna mai chauh a ni.Sim a tha khawp mai.Sumdawngho thangkamah kan awk rei ta lutuk a ni.
Kan thupuiah kan kir lawk dawn!Always inspiring! mawlh mai hi!He dawr neitupa hi mi thiam a ni bawk a.A hawihhawm a,hlim hmel pu takin a customerte a lo ,’ welcome,’ thin. A chapo lova,a uang hek lo.A customerte tan a inhawng hlei bawk.Thupui a a hman ang hian mi rilru tihnat a duh lova,mi thinlung hliam chu a thil hlauh ber a ni thin.MRP aia sangin engmah a hralh chhuak ngai lova, an bungraw man uchuak takin a chhiar ngai hek lo.He Dawrkaipa ang hi mipuiin kan mamawh a,Zoram riangteah hian kan zawng a,kan beisei mek a ni.
India ram puma Consumer right veitu intel khawmna Consumer Advocacy Group chuan WhatsApp Group an siam a.Mizoramah pawh din a ni a.He Groupah hian mithiam pui pui an awm nual a.WhatsApp Group a hranin kan siam ve bawk.Hei hi mi tam takin an chawr mek a ni.Ka sangawi zawnpui Pu C.Rohnuna phei chu he Groupah hian a active hle.Pu Lianchungnungate,Pu Manghakate,Pu Remlalsiamate,Pu Mawiizualate hi an active viau bawk.Heng WhatsApp Groupahte hian Consumer Clipping bengvarthlak tak tak,consumerte tana entawn tur a awm thin a.Tuna kan thuchhuah pawh hi he Groupa thiante clilping atanga ka lak chhuah a ni.
Saptawng bawkin i han keu teh ang.’Woman misses flight,Uber India fined 20k,’tiin.He hmeivhhia hi Ukil a ni.S huaisen satliah lova,mi fing a ni.Consumer a nih angin a, ‘right’,chu a championpui ngam a ni.Mizo minu te hian ngam ve tak maw.!
He Advocate Kavita Sharma hian Rs 563/- man Thlawhtheihna ticket a la a. He Thlawhtheihna hi 12.June.2018 5.50 pm a thlawk chhuak tur a ni.Reporting time dar 3.29 a ni.
Mahse,Uber driver hian minute 14 zeta a thlen tlaipui avangin Thlawhtheihna chuan he nula hi a thlawh chhuahsan ta a.A zin proramme pawh a thulh phah ta hial a ni.A thinrimthlak hle ang.
Tichuan, Advocate hian Uber India Office -ah kalin a lungawi loh thu a va thlen a. Mahse,Uber hotute hian an lo ngaihsak tha duh lova.”Driver mawhphurhna a ni e, kan mawhphurhna a ni love,”tiin an thiam loh a nih loh thu an lo hrilh zek a.
Advocate K.Sharma chuan a lungawilohna thawi dam a nih theih nan leh a dikna leh chanvo chan ngei tumin Thane Additional District Consumer Disputes Redressal Commission hnenah Uber India chu a khing ta a ni.
Consumer Commission chuan ngun takin a lo ngaihtuah a,Deficient service awm ngeiin an hria a. Uber India chu thiam loh chantirin compensation Rs 20000/- chawi turin an ti ta a ni.