Chhiatna rapthlak tak a thlen hnua thil thlengte video leh thlalaka thehdarhah chuan fire thuneitute leh mipuiin nikhawhrelova awm mi an buaipui lai leh thawktir tuma an bei laite a lang a. A hnu leh deuhva thlalak thehdarhah chuan ruangte chu kawtthler sirah mut an ni a, kawr serthlum rawng haa emergency worker che lai leh hlanga ambulance-a an hlang laite pawh a lang.
Seoul Metropolitan sorkar chuan emergency text message thawn chhuakin Itaewon chhehvela la awm zawng zawngte chu haw nghal turin an ti a. Pathianni thleng khan chin hriat loh mi 355 an awm thu report an dawng tawh bawk.
An hnuaia thawk mi 60 chu damdawi in 50 chuang thi chhungte buaipuia lo dawngsawng turin an chhawp nghal bawk.
The Korea Herald chanchinbu chuan chhiarna thlenna hmun atanga hla lo te, Soonchunhyang University damdawi inah chuan mi tam takin an chhungte chinchang ngaihvena an pun khawm thu a tar lang.
Nu pakhat chuan a fapa a zawng a, a phone a chhan loh avangin police a pan a, police officer pakhatin a fapa phone chetna hnuhnung ber chu Itaewon a nih thu hrilhin a pan nghal tih a sawi.
“Itaewon ka thlen chuan phone bo a lo tam lutuk a, damdawi in hnai ber hi ka pan leh ta ngawr a ni,” tiin Korea Herald hnenah hian a sawi a. Thi zat an sawi a hriat chuan, “Chuti zat chu maw ni? An tam lutuk. A thi zingah a tel thei, engmah ka hre lo, ka be thei bawk si lo,” a ti.
Nu dang pakhat pawhin mitthite an dahna gymnasium leh damdawi in chu a kar tawn sek ringawt tih a sawi bawk.
“Khawiah nge ka kan chuan ang?” tiin police officer-te chu a zawt a. “Engnge ka tih leh dawn tih min hrilh rawh u,” a ti bawk.