Ram dang atanga dan lova lak luh kuhva rah phur truck pathum chu nimin khan Darlak khaw daiah a kang a, a kan chhan hriat a ni lo.
Thudawnnain a sawi danin, dan lova lakluh kuhva phur truck pathum hian Mamit lam atanga Kanhmun lam panin, car var pakhatin an hma a hruai a. Truck pathumte hi Kawrthah khaw luh hma atanga let lehin, Darlak khaw dai an thlen hian a kang tih an hre ta mai a. An hmahruaitu car erawh a chin an hre zui lo thung.
Hachhek Bial Kuhva Chingtu Pawl (HBKCP) hruaitute chuan ram dang atanga dan lova kuhva lak luhten an thar ve hralh kawngah harsatna a thlen nasat avangin a dang turin an bial chhung hmun hrang hrangah an duty tih an sawi a. Tun tuma kuhva phur motor kang pawh hi Kawrthah lamah duty an awm tih lo hrilh ru an awm avanga tlan let leh an nih an rin thu an sawi.
Kuhva phur motor a kang tih an hriat hnuah thil awm dan hriatchian tuma Darlak lam chu an pan thu sawiin, an thlen chuan motor kang bak hmuh an neih loh thu leh a kan chhanah rin dan pawh an neih thiam loh thu an sawi bawk.
Darlak khaw daia kuhva phur truck kang hi pathum niin, pakhat erawh chu a kang nasa lutuk lo nia thudawn a ni.
Nimin vek khan HBKC chuan an kuhva tharte Assam lama hralh turin kalpui mah se Assam chin an luh hnuah Assam Police-ten an lo dang.
HBKC sawi danin police-te chuan an kuhva phurh chu Hachhek biala thar ngei a ni tih ringhlel lo mah se, thuneitu sang lam atanga dang tura tih an nih avangin an kaltlangtir thei ta lo va, an let leh ta a ni.