AZL: Dimapur-a Geology & Mining Minister intawhkhawmna hmang tura zin, Commerce & Industries Minister Dr R Lalthangliana chuan Zirtawpni zan khan Downtown Hospital leh Eye Care Hospital tlawhin damdawi in hotute a kawm.
Gauhati Mizoram House-a an inkawmnaah hian Dr R Lalthangliana hian, Downtown Hospital leh Eye Care Hospital hotute chu Mizoram sorkar nen thawhdunna tha zawk neih dan turte, Mizo dam lote’n awlsam zawka an pan theih dan turte a sawipui a ni.
Hemi hnu hian C&I Minister Dr R Lalthangliana hian Gauhati Mizo Students’ Union-te kawm lehin, zirlaiten an mamawhte an lo thlen a. November 30, 2022-a an Silver Jubilee pualin Minister hian sum fai a hlan bawk.
Inrinni khan Dr. R. Lalthangliana hian SASRD, Medziphema Campus, Nagaland University-a tlawh bawk a, campus hotute leh Medziphema Mizo Students’Union-ten lo dawngsawngin chaw chhun an lo buatsaih sak a. Minister hian Mizo zirlaite hi a tula hman atan pawisa a hlan leh bawk.
Medziphema Campus-ah hian Mizo zirlai mi 25 an awm mek a ni.