- Rinfela Zadeng
Kum 2006 kum tir lama Pawl Sawm exam tura Bus-a kan chuan tum hian Government Higher Secondary School-a Pawl Sawmpahnih zir mek hmeichhe pakhat hi Bus-ah chuan a lo chuang ve a. Matric exam chhunga Bus-a kan chuan dun ziah hnuah chuan kan lo innel hman ta viau a; Pawl Sawm ka pass a nih chuan Home Science la turin min hmin hman der mai!
Pawl Sawm zirlai aia Home Science subject la tura min hmintu chu exam lai laia ka buaipui zui tak avangin ka fail ta a; kum 2007 – ah Pawl Sawm exam nawn lehin Home Science ngei mai chu ka’n la zui ta bawk a nih kha!
Home Science subject la chu Section C – ah Economics subject la nen kan awm ho a; Home Science subject kan zir chhungin Economics la ho chuan Commerce subject la te an va fin ve thin a. A tam zawk kan nih avangin keini chuan class room kan luah zui thin.
Home Science Subject awmna section tih takah, kan class kha hmeichhia an tam em em a; mipa chu sawmpakhat chiah kan awm a. Mipa zinga Home Science la awm chhun ka nih avangin kan zirtirtu Miss pahnih te khan min duhsak thei hle a; ka la tui zêk zui leh nghal a! Pawl Sawmpahnih ka nih kumah erawh kha chuanin ka thianpa hian Home Science chu a lo la ve a; mipa pahnih kan awm ve ta a nih chu.
Home Science zir tura min hmintu hmeichhia chuan Pawl Sawmpahnih a pass hnuah nurse a zir a; tunah chuan Aizawl khawii emaw Hospitalah hian a thawk mek niin ka hria a; pasal a nei tawh bawk.
Kum a lo vei a; Home Science ka zirpui te chu hmeichhia deuh vek an nih avangin tunah chuan a tam zawk chuan pasal an nei tawh a; kawppui la nei lo chu mi tlemte kan ni tawh. Kum 2020 Lockdown tirh khan, a theih ang angin kum 2007 – 2008 kuma Pawl Sawmpakhat leh Pawl Sawmpahnih zirlai, Section C – a mi te chu ka zawng khawm a; WhatsApp Group kan siam ta a; a lunglenthlak hle.
Kum 2009 kum tirah Pawl Sawmpahnih kan zo a; chuta tanga ka hmuh zui tak miah loh hi a tam zawk an ni a. Kum 2016 a Champhaia KTP General Conference kan neih tum khan kan zirpui hmeichhe pakhat, Economics subject la chu ka hmu hlawl mai a. Kan inbia a, a phone number han dil nghal em chu – kan inhmu lo rei tawh sia tiin ka dil ngam ta lo a. Kum 2019-a Ramhlun North Presbyterian Kohhrana kan inkhawm tumin Bial Zaipawlah a lo tel a; chuta tang chuan kan inpawh leh thei ta a ni.
Pawl Sawmpakhat leh Sawmpahnih kan zirlaia Home Science min zirtirtu pakhat Miss Mahriati Tonsing chuan tunah hian BCM Pro Pastor pasalah a nei a; kum sawmpahnih hnu – 2022 a kan inhmu leh a; Pro Pastor nupui ni chungin a lo chhangchhe ve tawh hle. Sorkar hna a thawh mek lai bansanin BCM Pro Pastor nupui tha tak ni turin a inpe a; Pathian malsawmna lo dawng zel rawh se.
Home Science – ah khan Practical-ah Omelette siam dan te, puan thui dan chi hrang hrang te kan zir a. Ka la hriat ve reng chu ‘blind stitch’ an tih, langsar lo taka thawmhnaw thui dan chikhat kha a ni. Practical Record Book-ah kan bel ve thlap a; hriau leh khawl la kha kan vei ve fua fua a nia!
Tleirawl tirh, nupui neih pawh kan rilrua a awm loh laia naupang enkawl dan, insuk dan chi hrang hrang leh eitur siam dan han zira han ngaihthlak tlauh tlauh mai kha chuh! A chang chuan ka tlin lo ve thin a ni. Section danga mipa te pawh khan mak min ti ve deuhin ka hria a; tuai emaw min tih kha ka hlau ve viau thin. Kan Miss te khan mipa dang lakah khan min chhanin min duhsak phah thei hle thung.
Mizoramah Mobile phone lo chhuah tirh kha a ni a, WhatsApp leh Facebook hi chu kan la hmelhriat lo a. Tlema hausa deuh khan Mobile Handset an nei a, Evangelical Union lam bultumin Sikul Directory te kha kan siam a; kei erawh chuan Mobile phone ka nei ve lo. Pawl Sawmpahnih kan zirkum khan Class Represent/CR atan min thlang ve hlauh mai a. Vawiin thlengin an tan chuan an CR kha ka ni ve reng tawh dawn a ni.
Hun hi a lo kal chak a, khang hun lai te khan a rei chho ve tan ta reng mai a. Nuipui pasal neiin leh hna hrang hrang thawkin kan lo awm darh zo tawh a. Vawikhat na reng reng hi chu kan sikulah khan, a room ngaiah, uniform nen ngei khan han inhmuhkhawm leh hi ka chak thin hle a ni.