Aizawl: YMA Sub. Hqrs Lunglei-in an lo rel tawh angin vawiin hian kawng chhe laite a hmunah kalin an enfiah dawn a, an duh ang hmalakna a awm loh chuan an thiam dan anga hma lak an tum chu an dinna ngai a la reng.
Zirtawpni kalta tlai dar 3:00 khan Chief Engeneer (Planning ) PWD Er. Lalrinkima Hnamte leh YMA Sub Hqrs, Lunglei hruaitute YMA Conference Hall, Lungleiah inkawmin, Aizawl-Thenzawl-Lunglei (ATL) Road bakah Lunglei kawng chungchang hrang hrangte an sawi ho.
YMA Sub-Hqrs Lunglei President Lalrotluanga’n inkhawmkhawmna hi kaihruaiin YMA hmalak tawh dante a sawi a. Kawng siam tur hian a chak thei ang ber leh tha thei ang bera hmalak chu an duh dan a nih thu a sawi a. An lo rel tawh angin vawiin hian kawng chhe laite a hmunah kala an enfiah tur thu leh, an duh ang hmalakna a awm loh chuan an thiam dan anga hmalak an tum chu an dinna ngai reng a nih thu a sawi.
PWD lam chuan November 5, 2022 (Inrinni) thleng Bhavya Company chu an ngaihchan tur thu lehkhain an hriattir dawn niin an sawi a. Hemi hun chhunga an duh ang a hmalakna a awmlo a nih chuan Bhavya Company security deposit la awm hmanga siam dan ngaihtuah an tum thu an sawi ve thung.
Inkhawmkhawmnaah hian ATL Road bakah khawpui chhung kawng siam tur chungchang leh thil dangte pawh sawi a ni a. Khawpui chhung kawng siam a nih hunah YMA-ten theihtawp chhuah a hnathawktute puih leh venpui an inhuam thu an sawi bawk.
Hetihlai hian, YMA Sub. Hqrs, Lunglei chuan vawiin hian helai kawnga hmalak dan a hmunah an enfiah dawn a, an duh ang leh beisei anga hmalakna an hmu lo a nih chuan executive committee meeting an nei nghal ang a, committee thutlukna angin hma an la zui nghal dawn niin thudawn a ni.