Dy. Speaker Er Lalrinawma’n “mitinin kan mamawh, kan hringnun bulthut chu zirna hi a ni” a ti.
Govt. Lungpho High School-in golden jubilee leh HSLC exam centre thar an nih an lawmna a hmanpuinaah he thu hi bialtu MLA Er Lalrinawma chuan a sawi a. “Mihringte chu kan piantirh atangin zirtir ngai kan ni a, zirna leh hriatnain mihring nun a tinuamin a ti famkim a ni” tiin, mitin mamawh, hringnun bulthut chu zirna a nih thu a sawi.
School chu mihringin thil a zirna hmunpui ber leh pawimawh berte zing ami a nih thi leh a hlut thu Er Lalrinawma chuan a sawi a. “Zirna in kan neih ang ang te hi kan hluta, kan duat pawh a tul hle” tiin, Govt. Lungpho High School atangin mi puitling leh hlawhtling tak tak an chhuah teuh tawh thu leh chhuanawm a tih thu a sawi a. Khawtlang mipuite pawh an khaw school leh an nih phungte ngaihven renga, a neitu an ni tih an inhriat reng a pawimawh thu a sawi.
Er. Lalrinawma chuan Lungpho High School sorkarin HSLC exam centre thar atana a ruahmansak pawh lawmawm a tih thu sawiin, School Education department chungah bialtu MLA a nihnain lawmthu a sawi a. Exam centre hmingtha tak a nih ngei theihna tura tan la sauh sauh turin a bial mipuite a chah bawk.
School Education Director Dr. H. Lalthangliana pawh he hunah hian telin, Golden jubilee souvenir a tlangzarh a. Govt. Lungpho High School-in Golden jubilee an lawm kumah HSLC exam centre thar atana sorkarin a puansak chu a lawmpui thu a sawi a. Bialtu MLA, khawtlang nu leh pa leh NGO te inpekna zar a nih thu a sawi.
Mipuiten mahni ta anga enkawl chhunzawm tlat tura a beisei thu leh centre hmi- ngtha tak nih tir tum tlat turin Education director chuan a chah a. School upa an nihnaah lungawia inchhuang mai lova school tha leh rintlak zawk nih chhoh zel tuma bei turin thawktu, zirlai leh khawtlang nu leh pate a chah bawk.
Govt. Lungpho High School-in Golden jubilee lawmnaah hian MBSE Chairman JH. Zoremthanga, DEO Serchhip Lawmawma leh AMC Executive Councillor H. Zonunsanga te pawh telin, thusawina hun pek an ni bawk a ni.