Aizawl: MNF President Zoramthanga, chief minister chuan MNF party hi nakkum inthlanah Pathianin puan var a sintir leh dawn niin a sawi.
Inrinnia Durtlang Leitan YMA Hall-a Aizawl North I MNF Block Conference hmanpuitu, MNF President Zoramthanga chuan, “Thisen tam tak tak chhuaka hreawm tam tak tuartute hi nakkum inthlanah Pathianin puan var min sintir leh ang,” a ti.
Party hrang hrang chungchang sawiin Zoramthanga hian, nakkum inthlanah Congress hian MLA pahnih/thum bak an neih a rin loh thu a sawi a. MNF party hi BJP-in bei vak mah se, anni chuan beih let enah an en loh thu leh PC party pawh sawi tham an awm lo niin a sawi a. ZPM pawh hming ngah tawh, an hming a tam tawh lutuka sawi sual palh pawh hlauhawm tak a nih thu a sawi a. “An leader Pu Duhoma pawh kum 34 zet a lo bei tawh a, anmahni party din ngei pawh an kalsan leh zel a, tun thlengin an la hlawhtling thei lo. Kum 2018 inthlan khan ‘kohhran unit-ah kan hmang’ an ti a; chief ministerial candidate an nei a, Congress leh MNF chuan hetiang hi kan nei ngai lo, thil chiang sa a awm reng a ni,” a ti bawk.
MNF Aizawl North I Block President Lalrinmawia Sailo kaihhruai inkhawmah hian MNF president bakah P&E Minister R Lalzirliana, Aizawl Mayor Lalrinenga Sailo-te pawhin thu an sawi a ni.