Aizawl: ZPM Working President K Sapdanga chuan khawpui aiin thingtlangah ZPM thli a tleh na tawh zawk niin a sawi.
Inrinnia Haulawng, Chhipphir leh Zote South tlawha ZPM party hruaitute nen an inkawmnaah thu sawiin, tun hnaia khaw hrang hrang tlawha an chhuah chinah an party tan thlaphan chhan tur a awm lo tih sawiin, “ZPM thli hi thingtlangah a tleh na tawh zawk hle,” a ti.
K Sapdanga hian khaw tinah tunge an bial candidate tih aiin tunge an khuaa party hruaitu tih hi party tan lam nei lo mipuite zawhna a nih thin avangin, khawtlang mipui pawm theih hruaitu nih leh nih loh inenfiah a tul thu a sawi a. Inthlan hian candidate-te an inkhing a ni mai lo a, party-te an inkhin avangin a bulthut tual chhung politics a pawimawh tih a sawi.
Kum dangah chuan party-ten mipui an au thin a, nakkum inthlan atan erawh mipuiten an hmanhmawhpui tawh nia sawiin K Sapdanga hian, “EVM kan hmachhawn hunah Mizoram kan tichhe dawn nge kan chhanchhuak dawn? Zoram inlumleh dan boruak hi ZPM tan a inher tih tur emaw a ni zel,” tiin, Pathian pawhin remchang a siamsak an ni dawn em an tih fo avangin mi mal nuna chin dan tha lo an nei a nih pawhin, mahni insiam that nan hmanga Pathian rawngbawl chungin mihring rawngbawl a, an thupui, ram rorelnaa Pathian ram tungding turin theihtawp chhuah zel a tul thu a sawi bawk.