South Korea khawpui, Seoul-a kawtthler zim taka Halloween lawmtu mi tam tak pungkhawm zinga innek buaina nasa tak thlengah mi 153 vel an thi tih thuneituten an sawi.
Itaewon district-a Covid-19 a len hnua zalen taka zan lama Haloween lawmna lian tham huaihawt leh hmasak bera chhiatna thlengah hian mi 82 velin hliam an tuar bawk.
Thil thleng hmutute chuan mipui innek buai hian a tlu hmasate chu an rapin an chil nawk nawk niin an sawi.
Thi tam zawk hi tleirawl leh kum 20 bawr chho an ni a, ram dang mi 20 an tel bawk.
Chhiatna thlen chhan tak hi hriat a ni lo va; mahse, chanchinbu thenkhat chuan heng laia awm bar pakhatah hian milar (celebrity), a hming an sawi lan loh a awm ve tih thawm awm chu miin bawh huka luh inchuhnaa an innek buaina atanga thleng niin an tar lang hlawm a, a ni ngei tih finfiahna erawh a la awm lo.
Pathiannia emergency meeting an neihah South Korean President, Yoon Suk-yeol chuan hliam tuarte enkawltu tur task force din tur leh chhiatna thlen chhan chhui nghal a nih tur thu a sawi.
Thi zat hi tuna an sawi ang hi a nih chuan kum 2014 hnua South Korea-a tum khata mi thi an tam ber tum a ni dawn a. Sewol lawng pilah khan mi 300 chuang an lo thi tawh a ni.
Itaewon hi Seoul-a veng pakhat, zan lama intihhlimna hmun lian tak tak awmna a ni a. Tual chhung mi leh ram dang mite pawh kartawpah an kal nasa thei hle a, chhiatna thlen lai hi Halloween lawmna a nih avangin mi an tam zual hle.
Hripui leng avanga inkhuahkhirhna hlih a nih hnuah Halloween lawmna leh hmasak ber niin Inrinni zana kal khawm hi mi 1,00,000 vel zet a nih rin a ni a. Pun khawm theih zat bituk a awm tawh lo va, hmai tuam pawh a ngai kher tawh lo.
Kawtthler zim tak, awihtlan ni bawk si-ah innek buaina hi a thleng a. Social media-a thlalak leh video thehdarhah chuan mi an khat tlat tih hmuh theih a ni a, an tawt em avangin chet sawn pawh a harsa hial a. Video pakhatah chuan thawk pawh a harsa tih a lang thei a. Video dangah pawh rikrum thila che thinten mihring inbawh thuah kar atanga mi an la chhuak lai te leh tap thawm te hriat leh hmuh tur a awm bawk.
Ruang lak chhuahte hi kawtthler sirah puan duma khuha dah an ni a. |henkhat, nunna nei tawh lo tih hriat takte chu ambulance-ah an hlang bawk a. Nikhawhrelova let reng dangte chu CPR pek mawlh mawlh an ni a, hmun hrang hrang atangin emergency worker thawn luhten tanpui hna an thawk mawlh mawlh bawk.
Pathianni zing hma tang atangin an chhungte chin la hre lote chu a hmunah hian an pungkhawm tan a, an chhungte an ngaihven hlawm.
Ruangte hi zing lamah gymnasium-ah dah luh niin an chhungten an en tur leh tute nge an nih an hriat theih nan entir an ni a. Anmahni hre vek tur erawh chuan hun a la duh deuh dawn thu leh hriat vek chu an hna hmasa a nih thu thuneitute chuan an sawi.
President Yoon chuan hunpui hmannaa himna lam thil kalpui chu ennawn ngei a tul thu a sawi nghal.
Khawvel ram hruaitu hrang hrangte chuan pawi an tih thu an sawi hlawm a. British Prime Minister Rishi Sunak leh French President Emmanuel Macron chuan South Korea tawrhna chu an tawrhpui tak zet tih a sawi.
Seoul-a EU palai, Josep Borrell chuan a lungchhiatthlak tak zet thu a sawi a, US national security adviser, Jake Sullivan chuan pui tura an inhuam reng thu a sawi bawk.