Somalia khawpui, Mogadishu-a kawngpui intawh khawmna lun lai taka car bomb pahnih puakah mi 100 vel an thi tih President Hassan Sheikh Mohamud chuan a sawi.
Thi zingah hian ‘nu, an fate pawm lai pawh an awm’ tih president hian a sawi niin AFP news agency quotes chuan a tar lang.
Ram dang mite chu hliam tuar mi 300 vel enkawlnaa pui turin a sawm nghal bawk.
President hian Inrinnia beihna thleng hi al-Shabab hel pawl tihah puhin a bul lawka education ministry chu an tum niin a sawi bawk.
Jihadist lam awntu, Somali Memo website pawhin he pawl tih a nih thu a tar lang bawk.
al-Qaeda hnuaia awm, al-Shabab hi Somali sorkar nena hun rei tak lo indo tawh an ni.
Thla nga chauh thuneihna la chang, President Mohamud chuan August thlaa Mogadishu-a khualbuk lar tak beihnaa mi 21 an thih hnuah khan Islamist helho lakah hian ‘indo tak tak’ a puang.
Inrinnia bomb pahnih puak hi minute kar reilo te inkara mi a ni a, a bulhnaia in leh lirthei eng emaw zat a tichhia.
A puak hmasa hian education ministry a fuh a, a dawt leha mi hian bomb puakna hmuna kal damdawi lam thiamte chu a lo bitum leh niin Reuters news agency chuan a tar lang.
Helai hmunah tho hian kum nga liam taah khan lorry puakin mi 500 chuang an lo thi tawh a, hei hi an ram chanchina beihna thlenga thi an tam ber tum a ni.
Inrinnia bomb a puak hnuah hian an chhungte chanchin ngaihvenin mi tam tak an pungkhawm nghal.
Thi zingah hian chanchinbumi hriat hlawh tak leh police officer hlun tak pawh an tel.
Thil thlenna hmun a tlawhnaah President Mohamud chuan, “Somali mipuite hnenah ka sawi duh chu, Pathian hmingin hetiang beihna hi a thleng nawn tawh lo tih hi a ni,” a ti.
“Sorkar sipaiten indona mualah kan hneh hnuah bomb tihpuah hi helhovin an la dam a ni tih thu min rawn hrilhna a ni,” a ti.
Somalia-a African Union (AU) mission chuan ‘sipaiten al-Shabab chhut chimih tuma an beihna kal mekah he thil thleng thil pawimawh tak a ni thei’ niin a sawi.
US, Turkey, Qatar leh Germany chuan beihna thleng an dem tak zet thu an sawi hlawm.