Tuirial Airfield venga Tuialthei phur tanker chesual avanga kang mei chhuakah mi pali thiin, mi 16-in hliam an tuar a, chenna in pakhat leh lirthei pali a kang chhia.
Chhiatna thlenna hmun tlawhtu The Zozam Times zawhna chhangin Tuirial Airfield Branch YMA Secretary Lalhranga chuan tanker hi Inrinni chawhnu dar 2 bawr velah khan a chesual tih a sawi a, “A chetsual lai lo hmututen an sawi danin a tlan chak hle a, lirthei khalhtu hnam dang mi chu a rui hle bawk,” a ti.
Lalhranga chuan tanker leta tuialhthei buai chu a bul hnaia cheng leh kawng kalten an dawh luai luai tih a sawi a, thim tawh hnu tlai dar 6 vel khan a rawn alh ta phut a, a bul hnaia awmte chu an kang ta a, thelh mih hleih theih lohin a kang nasa tih a sawi.
A sawi zel danin tanker kang avang hian a hmunah mi pali – Rohlira (74) h/o C.Lalremmawii, Tuirial; Sangremzovi (36) w/o Lalrinawma (L), Tuirial; Lalnunhlima (36) h/o Esther Vanneihtluangi, Thingsulthliah leh Dennis Lalthianghlima (29) s/o Lalzawma, Lamherh khua, Ramthar Veng, Aizawla cheng mek te chu an thi nghal a, Tuirial mi leh sa bakah veng dang mi telin mi 16 chu kangmei avang hian hliamna tak an tuar a, damdawi in hrang hrangah dah mek an ni.
Tuirial Airfield branch YMA hruaitute chuan tanker chetsual thu an hriat veleh police an hriattir nghal a; mahse kangmei chhuah hma zawngin thuneitu lam a hmunah hian an thleng lo tih an sawi a, YMA hruaituten tuialhthei dawhtu mipuite chu khap mah se an inkhap hneh lo a, vanduaina rapthlak tak hi a thleng ta tih an sawi.
Tuialhthei phur a alh tan tira a bul hnaia awm ina pa pakhat chuan zan thim hnuai a tuialhthei an dawh mek lai khan mi pakhatin lighter a talh êng a, kangmei chu a chhuak chhunzawm ta tih The Zozam Times a hrilh.
Kangmei chhuak hian tanker chetsualna bul hnaia awm Lalnghakliana farm house-a chenna in pakhat chu a kang ral vek a, hemi bakah hian taxi pakhat leh scooter pathum a kang ral a ni.
Tanker kang avanga thite hi nimin khan Aizawl Civil Hospital-ah postmortem nghal an ni a, hemi hnuah an vengah theuh phur thlen niin, nimin vek khan vui liam nghal an ni.
A bul hnaia awmten an sawi danin, petrol alhin a kan hlum takte hi an ruang a chhe hneh hle a, an hmel hmuh tlak a awm lo a, a tirah phei chuan hmeichhia leh mipa pawh hriat hran har khawp a ni.