Aizawl : Aizawl West III bialtu MLA VL Zaithanzama’n a bial chhunga awm Govt. Johnson College-in NAAC Grade ‘B’ an nih an lawmna hmanpuiin, “Zirna hi ka ngai- pawimawh takzet a, Aizawl West III bial mipui ten MLA atana min thlan tlin khan ka hna hmasa atan zirnaa a bul ber Anganwadi te tlawhin bul kan tan a, bial chhung zirna school hrang hrang tun thleng hian ka tlawh reng a, an mamawh hrang hrang te MLA fund hmangin kan pui ve thin a ni” a ti.
VL Zaithanzama chuan a biala zirna in hrang hranga thawktute inpekna ropui a tih thu a sawi a. A biala zirna in hrang hrang te a tlawh kim thawhkhat tawh thu sawiin, zirtirtute inpekna, thawhrimna ten a tilawm nia a sawi rualin, school building tam tak a chhiain thawmthat ngai a tam thu leh theihtawpin hma a lak thu a sawi.
Govt. Johnson College-in building thar tha tak mai an nei leh National assessment and accreditation council endikna paltlanga grade ‘B’ accredit- ation an nei thei chu a lawmpui takzet thu bialtu MLA chuan a sawi a. “Hlauhna leh zahna hian hlawkna engmah min pe lova, kan hmaa tih tur awmah huai taka kan beih chuan kan hlawhtling zel ang,” tiin zirlaite a fuih bawk.