- Ruata
Asia khawmualpuia lirthei phochhuahna hunpui zinga a lian ber, Auto Expo chu kum 2023-ah buatsaih a ni leh dawn ta a. New Delhi bula Greater Noida-ah nakum January ni 13 atanga ni 18 inkarah hian neih tura ruahman a ni.
Auto Expo hi kum tin neih thin a ni a, Covid hripui leng avang khan kum 3 ngawt mai neih theih a ni lo a. Nakumah hian an ti leh thei dawn ta a. A nghahhlelhawm viau a ni. He hunah hian company hrang hrangten an lirthei design thar leh chhuak har tawh lo tur te an lo phochhuak lawk thin a. He huanga kan tarlan lirthei, nakum leh a kum leh chhoa chhuak tur te pawh an phochhuak fur dawn niin a lang a. A nghahhlelhawm hle a, India company lar Maruti Suzuki, Tata leh company hrang hrang te bakah India ram pawna lirthei company te pawhin an lirthei chhuak thar tur leh hmalam hun atana an lo duan lawk, concept car te an phochhuak leh dawn a ni.
He hunah hian company hrang hrang – MG Motor India, Toyota Kirloskar Motor, Kia leh Electric Vehicle siamtu company thar BYD te pawhin lirthei thar an phochhuak dawn a. Tunhnaiah hian electric lirthei a rawn chhuak chho zel a. Petrol leh diesel hmang lo lirthei kan intihhmuh chhoh zelah hian electric hmang lirthei tam tak pawh company hrang hrangin an phochhuah beisei a ni a. Auto Expo hi lirthei market awm chho zel tur leh hmalam huna company hrang hrangin lirthei an tihchhuah chhoh tur hriltu lian tak leh mipuite hmelhriattirtu pawimawh tak mai a ni a, hei vang hian khawvel huapa lirthei lam kaihhnawih media te pawhin an ngaihven hle a ni.
Tun tumah hian passenger vehicle huanga company langsar tak tak tello tur erawh an awm a, two wheeler lam hi a tel dawn lo nual dawn bawk a ni. Auto Expo-a lirthei phochhuak tur hian lirthei company te hian sum tam tak an chawia, an in senso a ngai a, hei hi company tam tak telloh chhan a nih thu media hrang hrangin an tarlang a. Hei bakah hian lirthei thar chhuak tur nei mai lo company tam tak an awm bawk a, heng ho tan hi chuan telna chhan tur a awm lemlo bawk a ni. Heng avang te hian company lar leh lar vak lo pawh tam tak an tel dawn lo a ni.
He huna lirthei company thenkhat tello tur te chu Mahindra & Mahindra, Honda Cars India, Isuzu, Volkswagen, Skoda, Citroen leh Nissan India te an ni a. Tel tur hriatchian tawh te chu BYD (Build Your Dreams), Hyundai Motor India, Kia, Lexus, Maruti Suzuki, MG Motor, Tata Motors, Toyota leh Volvo te an ni.
Auto Expo 2023 atanga inhnukdawk te hi Audi, Volkswagen, Skoda, BMW, Citroen, Force Motors, Honda, Isuzu, Jaguar, Jeep, Land Rover, Mahindra, Mercedes-Benz, Mini, Renault leh Nissan te an ni. Hetah hian a chunga kan tarlan hmasak te pawh tarlan tel leh an ni.
Auto Expo, 2023-a lirthei phochhuah tura beisei te hi Maruti Baleno Crossover, 5-door Maruti Jimny, Toyota Innova Hycross, Tata Altroz, Tata Punch EV, Tata Safari facelift, Tata Harrier facelift, Hyundai Verna thar, Hyundai Creta facelift, Kia EV6, MG two-door micro EV leh Hyundai Ioniq 6 EV te a ni.
Two-wheeler brand lian Hero MotoCorp, Bajaj Auto leh TVS te chu he hunah hian an tel dawn lo niin a lang a. Electric two-wheeler company thenkhat Okinawa, Greaves Cotton leh adangte chuan an electric two-wheelers te an phochhuah beisei a ni.