Aizawl: ZPM Leader Lalduhoma chuan nimina an party pisaa chhung inkhawmah thu sawiin, Mizoram mipuiin eirukna leh hlemhletna an duh lo tak zet a nih chuan nakkum MLA inthlanah an lantir a ngai tih a sawi.
“Eirukna leh hlemhletna hrang hrangte kan duh lo takzet a nih chuan kum 2023 inthlanah mipuiten kan duh lohzia kan lantir a ngai a. Ram hlui zia thlak thei tawh lo, opposition an nih lai chauha piangthar thinte hi kan hnawl ngam a hun tak zet tawh a ni,” a ti.
A thlawna sem leh dawn, kut tling loa sum lak hi Pathian thu kalh tlat a nih avangin hetiang hmanga vote zawng thinte chu ringtu nihna anga an hnawl a, an kalsan ngam a hun tawh tiin ZPM leader hian a sawi a. Eiruknaah kohhran pawhin vawi eng emaw zat hma lo la tawhin, tunah hian Mizorama NGO lian ber, YMA pawh an auchhuak leh ta hial niin a sawi.
Lalduhoma hian sorkarna siam turin an inbuatsaih mek tih sawiin, “Mizoramin kan la hriat loh leh hmuh ngai loh thil tha kan hmu mawlh mawlh tawh dawn,” a ti a. An sorkar atanga ni za chhungin CBI an koh luh tur thu te, sorkar tha siam turin a taka thawk tur Lok Ayukta an din thar leh tur thu te, Val Upa Council-in thuneihna khauh taka a kenkawh tur thu te, party sorkar ni lo mipui sorkar a nih angin chief minister kaihhruaina hnuaiah Monitoring committee dinin, party dang hruaitute, kohhran leh NGO hrang hrang aiawhte an tel dawn tih a sawi.
ZPM leader hian an sorkarah chuan chief minister in hna chanpual a nei dawn lo tih sawiin, “Hei hi kalphung thar tha tak tur a ni,” tiin party thenkhatin chief minister leh party president hna chelhkawpin lal taka an insiam hian that lohna tam tak neiin, ZPM sorkarah chuan chief minister nih leh party president nih kawp a rem ve dawn lo niin a sawi bawk.