India khawthlang lam, Gujarat-a mihring kalna lei chima thi chu mi 141 zet an tling ta.
Tual chhung thuneitute chuan thi tam zawk hi hmeichhia, naupang leh upa an nih thu an sawi a. Morbi-a suspension bridge chim ta hi siam that (repair) a nih hnu chawlhkar khat vel lekah a chim zui a ni.
A chim lai hian Diwali lawma pungkhawm mi an tam hle tih thuneitute chuan an sawi.
Machchu lei chunga dawh lei hi metre 230-a sei niin British-ten India an awp hun lai, kum zabi 19-na laia dawh tawh kha a ni.
Thi hi tam hle tawh mah se an la pun ngei a rinawm hle.
Police, sipai leh disaster response team tam takin chhanchhuah hna an thawh chhunzawm mek zel.
Mi 177 chuang chhanchhuah an ni bawk tih thuneitute chuan an sawi.
Thil thleng hmutu pakhat, Sukram chuan, “Naupangte hi Diwali chawlh hmang niin helai hmuna hun hmang tura zin khawthawng an ni,” tiin Reuters news agency hnenah a sawi.
“An zavaiin an tla a, an indelh thuap tum mai a. Mi an tam lutuk avanga lei kha chim a ni,” a ti.
Social media-a video darh thenkhatah chuan tuiah hian lei chim thema inham tanga emergency team-in an chhanchhuah theih hun nghakte pawh an awm a. Dam chhuak zinga thenkhat chu leia inphan lêna inham kaia chhuak ta leh lui kama inhleuh kaite an ni hlawm.
Lei hi a chunga mi tam tak an awm lai, Pathianni zan dar 6:40 vela chim kha a ni a. A chim hma lawka video lak pakhatah chuan a lei hi a su dawt dawt a, thenkhat hlau chu a sira lênah an inham tang sa a ni.
Gujarat hi Indian Prime Minister Narendra Modi-a chawr chhuahna a ni a, thite chu sorkarin a râl tur thu a puang tawh a. Chhiatna thleng chu ‘a thinlung takin pawi a ti tak zet’ tih a sawi.
Thuneitute chuan thil thlen dan kimchang taka an chhui tur thu an puang a. Chei that a nih hnua hawn a nih leh hmain a him dan enfiah that a ni tawk lo em ni tih zawhna a awm mek a. Khualzinte pawhin an tlawh tam tak niin tual chhung mite chuan Julto Pul (lei inthen) tiin an sawi thin.
Home Minister Harsh Sanghavi chuan chhiatna thleng kaihhnawihah hian thubuai eng emaw zat an ziak lut tawh tih a sawi.