Apple-in an iPhone siam chhuahte an remkhawmna hmun, assembly factory lian ber, China-a thawktute chu Covid-19 darh thar leh avanga an hnathawhna hmuna kharkhip an nihna atangin an chhuak lui.
Online-a video thehdarhah chuan thawktu mi 10 chuangin plant hungna lawn liamin an tlan chhuak tih a lang a. He hmun hi manufacturer Foxconn ta niin Zhengzhou khawpui lailia awm a ni.
Chinese mipui leh sumdawng tam tak chu President Xi Jinping-a’n zero-Covid policy khauh tak a kalpuiin a hrek nain ning fe fe an tam tawh hle.
Factory chhungah hian mi eng zat chiahin nge Covid kai tih pawh hriat a ni lo.
Hetih lai hian Henan province khawpui, Zhengzhou-ah hian kar hmasa khan tual chhunga inkai chhawng mi 167 an awm a, a hma chiah chawlhkarin mi 97 an ni thung a, an pung niin Reuters news agency chuan a tar lang.
Mi maktaduai 10 chuang chenna khawpui hi hri kai an awm leh avang hian kharkhip a ni a, China-ah hian Covid darh zel tur ven nana inkharkhip hmak hmak an la kalpui zui zel a ni.
Foxconn hi US-a hmunpui nei, Apple tana an phone siam remkhawmtu an ni a, hnathawk sang chuang neiin Zhengzhou-a an hmunah hian mi eng zat chiahin nge hri kai tih hriat theihna a awm lo thung.
Taiwan-a hmunpui nei company hian Pathianni khan an hnathawkte chu an chhuak duh a nih chuan dan an tum loh thu an puang bawk.
Chinese social media-a video thehdarhah chuan thawktute hi chhuakin an in an pan hlawm a, vantlang inkalpawhna hmanrua erawh an hmang hlawm lo.
Thawktu pakhat, kum 22 mi chuan a thawhpuite nena an awm khawmna chu a hrehawm thu a awi a. “Plastic leh thira hungna kan kân ta a ni,” tiin Financial Times hnenah a sawi.
Thawktute hian an plant chhehvel chu ni eng emaw zat kharkhip a ni tawh tih ans awi a, Covid kai an thawhpuite chu ni tin endik niin khung hran an ni tih an sawi bawk.
October 19 khan Foxconn hian thawktute chu pawn lama thil ei chhuah an phal rih loh thu leh Zhengzhou plant-a anmahni pindan theuhvah ei turin an ti.
Hetih mek lai hian company hian Apple phone thar ber, iPhone 14 siam chhuah hna chu a ngai ang renga an kalpui tho thu an puang bawk.
“Sorkarin thawktute himna tura thil a kalpui chu kan ti zel ang,” tiin Pathianni khan Foxconn hian an thuchhuahah an tar lang.
Thawktu haw duh an awm chuan sorkar nen inrawnin lirthei an ngaihtuahsak dawn thu an sawi bawk.