Mizoram huaihawtin hmarchhak geology & mining minister-te intawk khawm

Mizoram sorkara Commerce & Industries department huaihawtin nimin khan Dimapur, Nagaland-ah India hmarchhak state hrang hranga geology & mining minister-te intawhkhawmna hmasa ber neih a ni a, Union Mines, Coal & Parliamentary Affairs Minister Pralhad Joshi-a’n a hmanpui.

Northeast Geology & Mining Ministers’ Conclave-a convener leh chairman, Minister Dr R Lalthangliana chuan, Northeast Mines Ministers’ Forum siam chu a vei thu leh minister-te inhmuhkhawmna tura hma an lak tak dan sawiin, Nagaland mines minister-in thleng tura an sawmna a pawm avanga lawmawm a tih thu a sawi.

Dr R Lalthangliana chuan India ram hmun dang nen khaikhinin hmarchhak state-a geology & mining department chu an hnufum bakah kawng tam taka mi dang tluk tura hmalak a la tul thu a sawi a. Mining legislation mumal tak neih a tul thu te, thawktu indaih lohna phuhruk a tul thu te leh an kutzala tla hna pawimawh hrang hrangte tha taka an thawh theihna tura budgetary allocation awmze nei zawk an mamawh thu te a sawi.

Minor Minerals concession rules kalpui a nih bakah quality tha neih nan ‘Star rating of mines/quarries’ a tul thu pawh Dr R Lalthangliana chuan sawiin, hmarchhak leilung hausakna laihchhuah chungchanga hmalakna tur pawimawh hrang hrangte a sawi a. DoNER/NEC funding pattern pawh geological & mineral development a tel ve theihna tura siam that a tul thu leh union minister leh mines ministry-a official-te chu hmarchhak state-te dinhmun dik tak hriatthiamsaka harsatnate sutkian a nih theihna tur leh hmarchhak hmasawnna atana kawng awlsam zawk dapsak ngei turin a ngen bawk.

Conclave hi session hnihah then niin chawhma lamah Convener Dr R. Lalthangliana kaihhruaiin hmarchhak state hrang hrang Geology & Mining Minister-te an inhmukhawm a, chawhnu lama union minister awm huna thu thlen turte an sawiho a. Hmarchhak state-ten harsatna leh mamawh thuhmun an neihte chu chawhnu hunah ministry hotute hnenah an thlen a ni.

Chawhnu lam session-ah khuallian Union Minister Joshi leh khualzahawm pahnih, Nagaland Chief Minister Neiphiu Rio leh Assam Chief Minister Himanta Biswa Sarma te pawhin thu an sawi a, tlai lamah cultural evening neih a ni bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427