Aizawl : PC party-in “tuialhthei dahkhawlna (Oil Depot) siam puitling thei lo MNF sorkar kan dem” an ti a. Chief Minister Zoramthanga hova Indian Oil Corporation-in Mizorama petrol leh diesel dahkhawlna tur (Oil depot) chungchang tun- hnaia an la khelho chauh chu zahthlak hlea an ngaih thu an sawi.
“Kum 35 liamtaa Brig. T. Sailo kaihhruai PC sorkarin tuialhthei dahkhawlna (Oil depot) Vairengtea a lo bun tawh hun engemawchen ṭangkai taka hman a nih hnua Lal Thanhawla kaihhruai Congress leh Zoramthanga kaihhruai MNF sorkarin an hluihlawn tawh hnuah pawh tun thlenga Oil depot Mizoramin a la nei ta lo fo hi PC party chuan a thanatthlak kan ti takzet a ni” an ti.
PC party chuan “MNF-in kum 5 term a hman zawh dawn tawh laia Chief Minister-in Oil depot neih dan tur a buaipui ṭan chauh hi ram leh mipuite hmakhawngaih lohthlak hleah kan ngai” an ti bawk.