Season khat a chak hnem ber Verstappen

Formula 1 world champion ni chiang tawh Max Verstappen-a’n season ropui a hman mekah hnehna record thar a siam a. Tun season a vawi 14-nan intlansiakah a tlan chak ber.

Pathianni zanah Mexico City Grand Prix-ah Verstappen hian a tir atanga tawp thlengin harsatna lian tawk lem lovin hma a hruai a. Mercedes car khalhtu, nikum lama a elpui Lewis Hamilton chu amah um theitu ber nimahsela British driver hian a tibuai tak tak thei lo.

Autódromo Hermanos Rodríguez tlankawnga a chak avangin Verstappen hian tun season intlansiak vawi 20 awm tawh atangin vawi 14 pakhatna a hauh a. Hamilton chuan pahnihna hauhin pathumnaah an ram mipui tan hlawh tak, Red Bull Racing ho Mexican driver Sergio Perez a thleng.

Record siamtu Max

Kum 25 mi Dutch driver Verstappen hi intlansiak hmachhawn tur la awm pahnihah pawh hnehna chang tura rinkai ber a ni mek a, record thar ropui tak a siam chhunzawm ring an tam.

Tun dinhmunah kum 2004 leh 2013 a German driver ropui pahnih Michael Schumacher leh Sebastian Vettel ten intlansiak 13 a an chak record chu a khum.

Nimahsela F1 driver ropui Schumacher hian season khata intlansiak 18 chauh an neih thin laiin record hi a siam a. Vawi li world champion ni tawh Vettel-a’n a siamin season khatah vawi 19 an tlan.

Verstappen a win percentage hi 70.00% a ni chiah a. Schumacher-a’n kum 2004 hian 72.22% a nei. Dutch driver hian hnehna a chan belh chuan percentage-ah pawh a khum dawn.

Mexico intlansiakah Mercedes in tlankawng mil taka car an setup theih avangin hma an sawn a, Red Bull eltu ber an ni.

Nimahsela intlansiak ni ah race strategy-ah Red Bull in tihsual an nei miah lova, an tum ang thlapa an tlan avangin Anglo-German team tan um an har.

Lehlamah Mercedes car pahnihah an bul tanna medium compound tyre atanga hard compound tyre a an car ke an vuah hnuah driver-ten an sawisel zui ve ve a, an duh anga chaka han tlanpui turin harsatna an nei niin intlansiak laiin an sawisel leh thin.

“Bul tan a, soft tyre vuahlaia tlan that a pawimawh dawn tih kan hria a, kan tum ang ngeiin kan tlan tluang. Medium vuah hnuah pawh thil a kaltluang a, a tawp lamah khan tlahniam deuh mah ila kan inkar a zauh tawh avangin kan buai ta lo a ni.” tiin Verstappen chuan a sawi a. “Kan tan season ropui a ni a, kum khatah vawi 14 ka chak ang tih hi ka inring pha ngai lo.” a ti bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427