Premier League a season tha hmang mek Arsenal in America a che tha tak forward an ngaihven a, tunkarah inbiakna an neihpui dawn niin thu a thang mek.
Major League Soccer team Orlando City attacker kum 22 mi Facundo Torres chu Gunners hian hun engemaw chen atangin an ngaihven tawh a. An scout Toni Lima chu an vil uluk tir hle.
Uruguay international hian January thla khan Penarol atangin Orlando in Pound maktaduai 7.8 in a pan a. Tun season-ah match 40 atangin goal 13 a khung a, assist vawi 10 a nei.
July thla a Arsenal pre-season inbuatsaihna a friendly a an inkhelh atang tawhin Gunners hian an ngaihven a. Arsenal technical director Edu leh Torres-a aiawhten inbiakna tun kartawpah an nei dawn niin thawm a ring hle.
Gunners hian dinglam kila Bukayo Saka nena inel tur forward neih belh an duh a. Insawn theihna turin indawrna mumal engmah kalpui la ni lo mahse Arsenal in lo ngaihven hma an duh.