Rome derby atana inbuatsaihna duhthusam AS Roma in an hmang a, an hmela Lazio chunga awm turin hnehna pawimawh Thawhtanni zanah an chang.
Verona a Stadio Marcantonio Bentegodi-ah Roma hian table mawng lama awm Hellas Verona an tlawh a. Che fuh thei lawk lo mahse second half tawp dawnah goal hnih khungin 3-1 in an chak.
Jose Mourinho pawlte hian hun tam zawk chhung red card avanga tlem zawka khel Verona lakah hian goal an khung hleithei lova, chance tha an hloh hnem.
Striker Tammy Abraham-a’n huntha a bawhpelh ngun viau. Minute 26-naah Pawel Dawidowicz chuan Verona tan goal a khung a. Minute 10 hnuah red card a hmu zui.
Roma in halftime dawnah Nicolo Zaniolo hmangin an sut a. Minute 88-naah rawlthar Cristian Volpato chuan goal khung leh chauhin huntawp hma in Stephan El Shaarawy chuan an goal thumna a khung.
Roma manager Jose Mourinho chuan, “Verona khan point khat hmuh tumin an theihtawp an chhuah a, an tih theih zawng zawng chu an ti vek. Coach naupang tak neiin kan tana inkhel ti harsa turin a rem thiam hle. Tun season kan inkhel zawng zawnga a aia tha in kan khel thei niin ka hre vek. Mahse zaninah kan tih theih zawng zawng kan ti in ka hria.” a ti.